2022 йилда таъсис этилган Ренессанс таълим университети бу йил илк битирувчи ёшларини катта ҳаётга йўналтирди. Шу муносабат билан пойтахтимиздаги Ёшлар ижод саройида 2024/2025 ўқув йили якунига бағишланган тантанали тадбир бўлиб ўтди.
Ренессанс таълим университетида замонавий ва инновацион ёндашувлар асосида сифатли таълим йўлга қўйилган. Бугунги кунда университет 3 та факультет, 10 та кафедра ва 30 дан ортиқ таълим йўналишига эга бўлиб, унда 279 нафар профессор-ўқитувчи фаолият юритмоқда. Уларнинг 100дан ортиғи турли илмий даражаларга эга ҳисобланади. Ушбу таълим масканида илмий салоҳият 50 фоиздан ортиқни ташкил этади.
Шунингдек, университет магистратура босқичида лингвистика, иқтисодиёт, бухгалтерия ҳисоби ва спорт фаолияти каби замонавий ва талаб юқори бўлган мутахассисликлар мавжуд. Ренессанс таълим университети халқаро нуфузга эга бўлиб, Индонезиянинг “UI Green Metric World University Rankings” рейтингида юқори ўринларни эгаллаган.
Тантанали маросимда қайд этилганидек, 2024/2025 ўқув йилида университет талабаларининг ютуқлари салмоқли бўлди. Хусусан, талабаларнинг 3 нафари математика фани бўйича халқаро олимпиадада 2 ва 3-ўринларни қўлга киритди. 5 нафар талаба Давлат стипендияларига сазовор бўлди. “Беш ташаббус”, “Универсиада”, “Талабалар лигаси” каби спорт мусобақаларида совринли ўринларни эгаллади.
Тадбир давомида ўтган ўқув йили якунлари сарҳисоб қилиниб, университет фаолиятининг асосий ютуқлари эълон қилинди. Шунингдек, профессор-ўқитувчилар ва талабалар бир қатор номинациялар бўйича тақдирланди. “Йилнинг энг яхши фаол талабаси”, “Йилнинг энг яхши спортчиси”, “Йилнинг энг яхши гуруҳ мураббийи”, “Йилнинг энг яхши тўгарак раҳбари”, “Йилнинг энг яхши илмий ишлар муаллифи”, “Йилнинг энг яхши бошқарув ходими”, “Йилнинг энг яхши ўқитувчиси”, “Йилнинг энг яхши кафедра мудири”, “Йилнинг энг яхши декан ўринбосари”, “Йилнинг энг яхши факультет декани” каби номинациялар шулар жумласидандир.
Шунингдек, маросимда Олий Мажлис Сенати аъзолари, Олий таълим, фан ва инновациялар вазирлиги вакиллари, профессор-ўқитувчилар ва зиёлилар ҳамда битирувчилар ва уларнинг ота-оналари сўзга чиқиб, бугун юртимиз ёшларига яратиб берилаётган кенг кўламли имкониятларни эътироф этди. Ренессанс таълим университетида яратилган шароитлар, юқори сифатли таълим ва эришилаётган натижаларни юқори баҳолади.
Таъкидлаш жоизки, ушбу таълим даргоҳида келгусида таълим сифатини янада ошириш, халқаро ҳамкорликни кенгайтириш, талабалар учун янги имкониятлар яратиш ва инновацион илмий лойиҳаларни йўлга қўйиш муҳим вазифа сифатида белгилаб олинган.
<iframe width="650" height="420" src="https://www.youtube.com/embed/YngHpd2IbLg" title="Renessans ta’lim universitetining ilk bitiruvchilari katta hayotga qadam qo‘ydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳтарама Комилова, Нишон Абдувоитов (видео), ЎзА