АҚШ президенти Дональд Трамп 3 июль куни Саудия Арабистони мудофаа вазири шаҳзода Холид бин Салмон билан учрашди. Улар Эрон билан боғлиқ вазият, Ғазодаги урушни тугатиш, ХАМАС гаровида қолганларни озод қилиш ва бошқа минтақавий масалаларни муҳокама қилган. Музокаралар Исроил бош вазири Биньямин Нетаньяхунинг 7 июль куни Оқ уйга ташрифи олдидан бўлиб ўтган. Трамп маъмурияти яқин ойларда Саудия Арабистони ва Исроил ўртасида тарихий тинчлик битими тузилишини талаб қилмоқчи, дейилади хабарда.

Россия ҳарбий-денгиз кучлари бошлиғи ўринбосари генерал Михаил Гудков Украина томонидан Курск вилоятида ўлдирилди. Бу ҳақда CNN хабар берди. Россиянинг Приморск вилояти губернатори Олег Кожемяко Гудковнинг ўлими ҳақидаги баёнотда у билан йиллар давомида ижобий муносабатда бўлганини айтган. У Гудковни “сафдошлари билан бирга офицерлик бурчини бажариш чоғида ҳалок бўлган мустаҳкам иродали жангчи” деб таърифлаган. Кожемяко генералнинг ўлими ҳақида бошқа ҳеч қандай тафсилот очиқламаган.

АҚШ 3 июль куни Эрон нефть экспортига қарши санкция жорий этди. Бу Исроил ва Эрон ўртасида ўт очишни тўхтатиш режими кучга кирганидан бери Теҳроннинг энергетика секторига қарши қўлланган биринчи жазо чораси бўлди. Санкция нишонига олинганлар орасида ироқлик тадбиркор Салим Аҳмад Саид ва унинг Бирлашган Араб Амирликларидаги компанияси мавжуд. АҚШ уни Эрон нефтини Ироқ нефти билан аралаштириб, контрабанда қилишда айбламоқда.

АҚШ президенти Дональд Трамп 2026 йилда Оқ уй ҳудудида UFC жанги ўтказилишини маълум қилди. Трамп жангнинг айнан қачон бўлиб ўтиши ва унда кимлар иштирок этиши ҳақида аниқлик киритмади.

Гаитида жиноий тўдалар пойтахтнинг 90 фоиз назоратини қўлга киритди. Бу ҳақда БМТ вакилига таяниб, Fox News хабар берди. БМТ вакили 2 июль куни Гаитини “қулаш арафасида” турганини таъкидлаган. Тўдалар пойтахт Порт-о-Пренснинг тахминан 90 фоизини назорат қилмоқда. Бу ҳақда БМТ Гиёҳванд моддалар ва жиноятчилик бўйича бошқармаси ижрочи директори Гада Фатхи Вали Хавфсизлик кенгашига маълум қилган. У ушбу тўдалар янада кенг ҳудудларни эгаллаб олаётганидан огоҳлантирган.

Россия президенти Владимир Путин АҚШ президенти Дональд Трампга Москва Украинадаги урушнинг “туб сабабларини” бартараф этишдан воз кечмаслигини айтди. Президентлар 3 июль куни 1 соат давомида телефон орқали суҳбатлашган. Кремль ёрдамчиси Юрий Ушаков “Россия ортга чекинмаслигини” маълум қилган. Бироқ у Путин “можарога сиёсий ва музокаралар йўли билан ечим излашга тайёрлигини” билдирган.

<iframe width="650" height="420" src="https://www.youtube.com/embed/cdZ99Q6txDU" title="Халқаро дайжест" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА