Пойтахтимизда Ўзбекистон халқ амалий санъати усталарининг ҳунармандчилик маҳсулотлари кўргазмаси ҳамда Ғайрат Жўраевнинг кулолчилик намуналари ўрин олган “Bright gallery” галереяси очилиши бўлиб ўтди.

Ғайрат Жўраев Бухоро вилоятининг Ғиждувон туманида туғилган. Ёш кулол кўплаб миллий ва халқаро кўрик-танловлар ва кўргазмаларда иштирок этиб, бир нечта медаль ва дипломлар билан тақдирланган.

Кўргазмада ёш ижодкорнинг 70 га яқин асарлари намойиш этилди. Жумладан, улар орасида «Ўйма нақш», «Буюк ипак йўли», «Юракдаги Бухоро», «Аждар», «Етти гўзалнинг бири», «Ҳаёт дарахти», «Тандир сотаётган бобо» ҳамда «Темурийзода» каби панно, кўза, лаган ва ҳайкалчалар тадбир иштирокчиларини ўзига ром этди.

Очилиш маросимида ҳунармандларнинг маҳорат дарслари ҳам ўтказилди. Хусусан, қизиққан иштирокчилар ўз қўллари билан кулолчилик маҳсулотларини ясаб кўришди. Шунингдек, тадбирда каштачилик, миллий либослар ва мисгарлик каби йўналишлардаги санъат асарлари ҳам намойиш этилди.

<iframe width="560" height="315" src="https://www.youtube.com/embed/RohQrMgOfH0?si=bS8jskw-dF5KAZlg" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Гулноза Бобоева, Нишонбой Абдувоитов (видео),

ЎзА