Германия ташқи ишлар вазири Йоханн Вадефуль Киевга аввалдан эълон қилинмаган ташриф билан келди, деб хабар бермоқда “Euronews” нашри. У ўз нутқида Украинанинг эркинлиги Германия сиёсатидаги “энг муҳим вазифа” эканини маълум қилган.
Биламизки, Германия Украинанинг АҚШдан кейин иккинчи йирик ҳарбий ҳомийси ҳисобланади. Аммо Қўшма Штатларнинг президент Дональд Трамп даврида яна Украинага ҳомийлик қилиш масаласи сўроқ остида қолмоқда.
Шу боис Вадефулнинг ташрифини Украинани бундан кейин ҳам қўллаб-қувватлашга ишора, дейиш мумкин. Унинг Киевда Украина етакчиси Владимир Зеленский ва ташқи ишлар вазири Андрей Сибига билан учрашуви белгиланган.
Вазир ўз баёнотида Германия Украинага бундан кейин ҳам ўзини ҳимоя қилишда замонавий ҳаво ҳужумидан мудофаа ва бошқа қуроллар, шунингдек, гуманитар ва иқтисодий ёрдам билан қўллаб-қувватлашини маълум қилган.
Бироқ расмий Берлин Зеленскийнинг кучли ва узоқ масофага учувчи “Таурус” ракеталарини бериш ҳақидаги илтимосини рад этган эди. Бунинг ўрнига Германия канцлери Фридрих Мерц Украинага узоқ масофали ракета тизимларини ишлаб чиқишда ёрдам беришга ваъда берди.
Йоханн Вадефулга Киев сафарида Германия мудофаа саноати вакиллари ҳамроҳлик қилишган. У шунингдек, Россия – Украина муносабатларига тўхталиб “Путин музокараларни эмас, балки Украинанинг таслим бўлишни хоҳлайди”, деган ўз баёнотида.
Хабарингиз бор, Россия ўтган ҳафта охирида Украинага ўзининг энг йирик ҳаво ҳужумини уюштирди ва бу жараён тинчлик учун қилинаётган саъй-ҳаракатларни барбод қилди, демоқда Украина расмийлари.
<iframe width="560" height="315" src="https://www.youtube.com/embed/pW9__-4UFKA?si=PZgNTO2-kzzMj1Fz" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА