Украина президенти Владимир Зеленский АҚШнинг 22 июнь куни Эрондаги ядровий обектларига берган зарбасини маъқуллади. Сиёсатчи Роосия Украина ҳудудларини Эроннинг Шаҳед дронлари билан нишонга олаётганини эслатиб ўтди.
”Украина осмонига Шаҳед дронларининг янги тўлқинлари ёғилмоқда. Россия бундай қуролларни қаердан олганини ҳаммамиз яхши эслаймиз. Эроннинг Россияни қўллаб-қувватлаш бўйича қарорлари мамлакатимиз ва бошқа кўплаб давлатлар учун улкан вайронагарчилик ва йўқотишларга олиб келди. Бунга нуқта қўйиш керак. Урушга ядро қуроли мутлақо аралашмаслиги керак”, деган эди Зеленский.
АҚШ президенти Дональд Трамп Исроил ва Эрон ўртасида ўт очишни тўхтатиш бўйича келишувга эришилганини маълум қилди. Трамп томонлар “12 соатга тўлиқ ўт очишни тўхтатишга” келишиб олгани, шундан сўнг уруш тугаган деб ҳисобланишини айтганди. Бироқ Эрон ташқи ишлар вазири бу борада ҳеч қандай келишув бўлмаганини таъкидлади. Аббос Ароқчи ўз баёнотида “Исроил Эронга қарши уруш бошлаганини, аксинча эмас”лигини қайд этди.
Бироқ кейинроқ Эрон ўт очишни тўхтатиш бўйича сулҳга эришилгач, Исроилни ҳужумларни тўхтатишга ва мағлубиятини тан олишга мажбур қилганини таъкидлади. Эрон ва Исроил ўртасида ўт очишни тўхтатиш Тошкент вақти билан 10:00 да кучга кирди.
Россия президенти Владимир Путин жамоат жойларидаги белги, кўрсаткич, маълумот пештахталари ва бошқа визуал ахборот воситаларида хорижий сўзлардан фойдаланишни тақиқловчи қонун чиқарди. Ушбу қарор матни Қонун ҳужжатлари расмий порталида эълон қилинган. Янги қоидалар 2026 йил 1 мартдан кучга кириши айтилган. Қонун “рус тилини давлат тили сифатида ҳимоя қилиш”, хорижий тиллардан ўзлаштириш даражасини пасайтириш ва “замонавий адабий тил меъёрлари”га риоя этилишини таъминлашга қаратилган.
Россияда мактабга бормайдиган мигрант болаларни оиласи билан мамлакатдан чиқариб юбориш таклиф қилинди. Россия президенти ҳузуридаги Фуқаролик жамияти ва инсон ҳуқуқларини ривожлантириш кенгаши раиси Валерий Фадеев шундай таклифни илгари сурди.
Амалдорнинг сўзларига кўра, Россияда 785 593 нафар “вояга етмаган чет эл фуқароси” истиқомат қилади. Аммо улардан фақат 192 254 нафари Россия муассасаларида таълим олаётганлар сифатида рўйхатга олинган.
Эрон ташқи ишлар вазири Аббос Ароқчи Исроил билан 12 кунлик уруш давомида кўрилган зарар “жиддий” эканини таъкидлади. Ароқчи урушда кўрилган зарар ҳозирда Эрон Атом энергияси ташкилоти томонидан баҳоланаётганини айтмоқда.
<iframe width="650" height="420" src="https://www.youtube.com/embed/AkrA8hodRw8" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Искандар Исматов, ЎзА