Туркияда ўтаётган халқаро теннис турнирида уч вакилимиз – Максим Шин, Амир Милушев ва Диана Яковлева муваффақиятли старт олди.

Халқаро теннис федерацияси томонидан ўтказилаётган M15 таснифига кирувчи ушбу мусобақанинг илк даврасида Амир Милушев германиялик Нино Эхреншнейдерни 6:3, 7:6 ҳисобида таслим этган бўлса, Максим Шин испаниялик Бернардо Месани 7:6, 2:6, 6:4 ҳисобида енгди.  

Шу тариқа, нимчорак финалга йўл олган Максим чорак финал остонасида франциялик Пол Инчауспе билан куч синашади. Амир эса туркиялик Биртан Дуранга қарши кортга чиқади. Ёш теннисчимиз Диана Яковлева илк босқичда италиялик Лукреция Мусеттини 3:6, 6:3, 7:5 ҳисобида таслим қилди ҳамда иккинчи даврада австралиялик Алана Субасик билан рақобатлашадиган бўлди.  

Маълумот ўрнида: мазкур мусобақанинг кечаги баҳсларида яна бир теннисчи қизимиз Милана Масленкова ҳам илк даврада зафар қучган эди.

Жавоҳир Тошхўжаев,

ЎзА