Аҳолининг, шу жумладан, тадбиркорлик субъектларининг интеллектуал мулк бўйича хабардорлик даражасини оширишга эътибор қаратилмоқда.

Яратилган интеллектуал фаолият натижаларини муҳофаза қилиш жараёнларини рақамлаштириш орқали ортиқча талабларни бекор қилиш ҳамда интеллектуал мулкни ҳуқуқий жиҳатдан ишончли тарзда муҳофаза қилиш борасида кенг кўламли ислоҳотлар давом этмоқда. 

Сенат ялпи мажлисида муҳокама қилинган “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун шу йўналишдаги ишларни янги босқичга кўтаришга қаратилган. 

Қонун билан Ўзбекистон Республикасининг айрим қонун ҳужжатларига ўзгартириш ва қўшимчалар киритилмоқда. Улар интеллектуал мулк объектларини давлат рўйхатидан ўтказиш жараёнини соддалаштириш, айрим интеллектуал мулк объектларини экспертиза қилиш муддатларини қисқартириш, рўйхатдан ўтказиш жараёнларида ортиқча ҳужжатлардан воз кечиш каби масалаларни ўз ичига олган.

Бундан ташқари, патент божларини тўлашда қўшимча қулайликлар жорий этиш ҳамда интеллектуал мулк объектларига бўлган ҳуқуқларни бузганлик учун жавобгарликни кучайтириш назарда тутилмоқда.

Жумладан, “Электрон ҳисоблаш машиналари учун яратилган дастурлар ва маълумотлар базаларининг ҳуқуқий ҳимояси тўғрисида”ги қонунга киритилаётган ўзгартиришга кўра, электрон ҳисоблаш машиналари учун дастурларни рўйхатдан ўтказиш учун талабнома келиб тушганидан сўнг керакли ҳужжатларнинг бор-йўқлиги ва қоидаларнинг талабларга қанчалик мувофиқлиги юзасидан ўтказиладиган текшириш муддати ўн кун этиб белгиланмоқда.

Саноат мулки объектларини рўйхатга олишда патентни тасдиқлаш тартиби енгиллаштирилмоқда. Бунда, саноат мулки объекти рўйхатга олинганда патент талабнома берувчига автоматик тарзда электрон тизим орқали юборилади.

Сенаторлар маъқуллаган қонун мамлакатимизнинг иқтисодий ривожланишига ва инновацион жиҳатдан юксалишига самарали таъсир кўрсатувчи интеллектуал мулк тизимини такомиллаштиришга хизмат қилади. 

Шунингдек, мазкур ҳужжат жамиятда интеллектуал мулкка бўлган ҳуқуқларга нисбатан ҳурмат ҳиссини шакллантиради ҳамда интеллектуал мулк эгаларининг қонуний манфаатларини ҳимоя қилишни кучайтиради. 

Н.Абдураимова,

ЎзА