Покистон ҳукумати ижтимоий тармоқдаги расмий саҳифасида АҚШ Президенти Дональд Трампни Ҳиндистон билан можарода воситачилик қилгани учун 2026 йилги тинчлик йўналиши бўйича Нобель мукофотига тавсия қилди.
— Яқинда Ҳиндистон-Покистон инқирози давридаги қатъий дипломатик аралашуви ва фундаментал етакчилигини эътироф этган ҳолда, Президент Дональд Трампни 2026 йилги тинчлик бўйича Нобель мукофотига расман тавсия этишга қарор қилдик, — дейилган баёнотда.
Қўшимча қилинишича, Трамп Исломобод ва Нью-Деҳли билан дипломатик алоқада бўлиб, дунё миқёсида “стратегик тарзда узоқни кўра билиш қобилиятини, ажойиб давлат арбоби эканини намойиш этган” ва натижада мамлакатлар ўртасидаги кескинликни пасайтиришга муваффақ бўлган.
Покистон ҳукумати, шунингдек, Америка раҳбарининг Кашмир масаласини ҳал қилишда мамлакатларга ёрдам бериш истагини қадрлашини қайд этди.
Трампнинг ўзи аввалроқ Яқин Шарқ ва Африкада тинчликка эришиш йўлидаги саъй-ҳаракати учун мукофотга лойиқ эканини айтганди.