Америка Қўшма Штатлари Эронга зарба берган тақдирда Буюк Британия ва ЕИ террор ҳужумлари тўлқинига дуч келиши мумкин, деб ёзмоқда Лондон матбуоти дипломатик манбаларга таяниб. Уларнинг фикрича, бундай ҳаракатларни Ислом Республикасининг ишончли вакиллари амалга ошириши мумкин.
Буюк Британия, Франция, Германия ва бутун Европа Иттифоқи АҚШни вазминликка чақирмоқда. Бунинг бир неча сабаби бор. Эронда Европа давлатларининг камида 15 фуқароси ҳибсда ушлаб турилибди. Улар жосусликда айбланяпти, бу ҳақда“The Telegraph” газетаси ёзган.
Исроил ва Эрон зиддияти кучайган бир пайт Британия Бош вазири Кир Стармер ҳаммани “дипломатияга қайтиш”га даъват этяпти. Франция Президенти Эммануэль Макрон ҳам шу мазмундаги баёнот билан чиқиб, АҚШ аралашувининг олдини олиш учун Эронга қарши амалиётни зудлик билан тўхтатишга чақирган. Франция раҳбари, шунингдек, Исроил бомбардимон қилишда чегарадан чиқиб кетганини ҳам айтган. Зеро, Исроилнинг дастлабки режаси Эроннинг фақат ядровий объектлари ва ракеталар сақланаётган ҳудудларини нишонга олиш эди.
Трамп Қўшма Штатлар Исроил-Эрон можаросига аралашишини истисно этмаган. У Теҳрондан сўзсиз таслим бўлишни талаб қилиб, сўзини“якуний ультиматум” деб атаган. Америка етакчиси таъкидлашича, Эрон Исроил зарбасидан олдин ядровий қурол яратишга яқин турган. Бинобарин, АҚШ разведкаси Эроннинг ядро қуроли яратиш устида ишлаётганини исботловчи бирор далил топмаган.
Оқ уй матбуот котиби Кэролайн Ливитт Трамп Эронга эҳтимолий зарба бўйича қарорини икки ҳафта ичида қабул қилишини айтган. “The Wall Street Journal”нашри ёзишича, Президент Эронга ҳужум қилиш режасини аллақачон маъқуллаган. Теҳрон эса агар учинчи томон Исроилни қўллаб-қувватлайдиган бўлса, “дарҳол жавоб зарба”си берилишини билдирган.
<iframe width="560" height="315" src="https://www.youtube.com/embed/8fJ3WOlB2zo?si=aAwLOebA2TLDw3xs" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА