Дунёга машҳур "Transfermarkt" портали томонидан футбол бўйича Осиё қитъасининг энг қиммат футболчилари рейтинги эълон қилинди. Унга кўра, Ўзбекистон миллий терма жамоаси ҳамда Англиянинг “Манчестер Сити” клуби аъзоси Абдуқодир Ҳусанов 35 миллион евро трансфер қиймати билан ушбу рўйхатда учинчи ўринни эгаллади.

Айни пайтда 21 ёшли марказий ҳимоячимиздан юқори ўринларда фақат Япония терма жамоаси ва “Брайтон” клуби футболчиси Каору Митома ҳамда Жанубий Корея ва “Бавария” сафида тўп сураётган Ким Мин Жэ (ҳар иккаласи ҳам 40 миллион евро) қайд этилган.

Шуни алоҳида таъкидлаш жоизки, ушбу рейтингда яна икки нафар юртдошимиз ҳам ўрин олган. Россиянинг “ЦСКА” клуби сафида муваффақиятли ҳаракат қилаётган Аббосбек Файзуллаев 8 миллион евро билан 27-ўринни эгаллаган бўлса, Италиянинг “Рома” жамоасида тўп сураётган Элдор Шомуродов 5 миллион евро баҳоси билан 42-ўриндан жой олган.

Жавоҳир Тошхўжаев,

ЎзА