Эртага, 18 июнь куни пойтахтимизда мукофот жамғармаси 121 минг 500 АҚШ долларидан иборат “UzChess Cup-2025” халқаро турнири бошланади.

Иккинчи бор ташкил этилаётган мазкур нуфузли турнирнинг "Masters" гуруҳида ФИДЕ рейтингида 2700 очкодан юқори баллга эга бўлган Аржун Эригайси, Рамешбабу Праггнанандхаа, Ян Непомнящий, Ричард Раппорт, Пархам Магсудлу ва ҳамюртларимиз Нодирбек Абдусатторов, Жавоҳир Синдоров, Нодирбек Ёқуббоев, Шамсиддин Воҳидов ғолиблик учун кураш олиб борса, “Challengers” гуруҳида Арам Акопян(Арманистон), Нижат Аббасов(Озарбайжон), Николас Теодороу(Германия), Василий Иванчук(АҚШ), Виталий Сивук(Швеция) Ма Цюнь(Хитой), шунингдек ўзбекистонлик Жаҳонгир Воҳидов, Муҳиддин Мадаминов, Муҳаммадзоҳид Суяров, Гулруҳбегим Тоҳиржонова дона суради. 

Бугун, 18 июнь куни халқаро турнирда иштирок этадиган хорижлик шахматчилар Ўзбекистонга етиб келди. Улар ташкилий қўмита аъзолари томонидан кутиб олинди. 

Бугун кун давомида мандат комиссиясининг йиғилиши ҳамда "Masters" ва “Challengers” гуруҳидаги ўйинлар учун қуръа ташлаш маросими ташкил этилади. 

Халқаро турнир низомига мувофиқ, 9 та турдан иборат бўлган баҳслар 27 июнга қадар давом этади. 

Эслатиб ўтамиз, иккинчи марта ташкил этилаётган “UzChess Cup-2025” халқаро турнирининг "Masters" гуруҳида ғолибликка эришган шахматчи 20 минг АҚШ доллари билан тақдирланади. Шунингдек, мукофот жамғармасидаги тегишли маблағлар 9-ўрингача жой олганлар орасида тақсимланади. “Challengers” гуруҳи ғолибига эса 6 минг АҚШ доллари насиб этади. 

Т.Рўзиев, ЎзА