Эрон олий раҳнамоси Оятуллоҳ Али Хоманаий Исроилнинг ҳужумлари бошланганидан бир неча соат ўтгач, ерости бункерига тушган. Бу ҳақда манбаларга таяниб Iran International хабар берди. Манбаларга кўра, Хоманаий бўлган объект Теҳроннинг шимоли-шарқидаги Лавизан туманида жойлашган. Олий раҳнамо билан бирга унинг оила аъзолари ҳам бошпанада яшамоқда. Хоманаий Исроилга қарши олдинги операцияларда — 2024 йилнинг апрель ва октябрь ойларида ҳам айнан шу бункерда яширингани айтилмоқда.
Украина ҳарбийлари Татаристондаги Елабуга шаҳридаги рус дронлари заводига ҳужум қилди. Ҳужум жойи Украинадан 1000 км узоқликда жойлашган. Украина ҳарбий бош штаби ушбу завод мамлакат энергетика ва фуқаролик инфратузилмасига қарши дронларни ишлаб чиқаргани, синовдан ўтказгани ва учирганини даво қилган.
АҚШ президенти Дональд Трамп Исроилнинг Эрон олий раҳнамоси Оятуллоҳ Али Хоманаийни ўлдириш режасини рад этди. Бу ҳақда АҚШ расмийларига таяниб BBC хабар берди. Трамп Исроил бош вазирига суиқасд қилиш “яхши ғоя эмаслиги”ни айтган. Президент бу юзасидан жамоатчиликка изоҳ бермаган.
Исроилнинг Эронга уюштираётган ҳужумлари ва уни давом эттиришга берган ваъдаси туфайли кўпчилик эронликлар хавфсизроқ ҳудудларни излаб пойтахт Теҳронни тарк этмоқда. Теҳрон шимолидаги Исроил зарбаларидан жабр кўрган бадавлат “Саодатобод” маҳалласи фуқароси CNNга кечаси билан портлаш овозлари эшитганини айтган. Уларнинг баъзилари шу қадар кучли эдики, бутун кўп қаватли уйини ларзага келтирган.
Исроил мудофаа кучларининг Эронга ҳужумлари оқибатида камида 14 нафар ядрочи олим ҳалок бўлди. Маълум қилинишича, олимларнинг баъзилари автомобилларга қўйилган бомбалар туфайли портлаган. Эроннинг Nour News агентлиги камида олти нафар ядрочи олим ҳалок бўлгани ҳақида хабар берган.
Россия урушда ҳалок бўлган яна 1,2 минг украиналикнинг жасадини қайтарди. Украина расмийларига кўра, қайтарилган жасадларнинг умумий сони 4,8 мингдан ошган. Лекин ўт очишни тўхтатиш ва 4 йилдан бери давом этаётган можарони тўхтатишнинг иложи бўлмаяпти.
Исроил сўнгги 48 соат ичида АҚШдан Эронга қарши ҳарбий операцияга қўшилишни сўради. Маълум қилинишича, Трамп маъмуриятидан Эроннинг уранни бойитиш дастурининг асосий элементларидан бири бўлган Фордо ерости ядровий иншоотини йўқ қилишда ёрдам сўралган. Исроил мурожаатининг асосий сабаби техник қийинчиликлардир.
<iframe width="650" height="420" src="https://www.youtube.com/embed/E36qQNwxiK0" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА