Эрон 15 июнь куни махсус амалиёт доирасида Исроилнинг қирувчи самолётлар учун ёнилғи ишлаб чиқарадиган заводлари ва электр таъминоти марказларига ҳужум қилди, дея хабар тарқатди Эрон Ислом инқилоби қўриқчилари корпуси (ИИҚК).

Қайд этилишича, агар Исроил ҳужуми давом этса, Эрон Қуролли кучларининг амалиёти “янада кескин ва кенг кўламли” бўлади.

Бундан ташқари маҳаллий матбуот Эрон Исроилнинг Хайфа шаҳрига зарба бериш учун камида битта гипер товушли ракетадан фойдаланганини маълум қилди. “Emad”, “Ghadr” ва “Kheibar Shekan” русумли ўрта масофага мўлжалланган баллистик ракеталардан ҳам фойдаланилган. Эрон қўллаган ракеталар “ўта вайронкор кучга эга” жанговар каллаклар билан жиҳозланган.

Исроил разведка хизмати юқори мартабали мулозими “Fox News” телеканалига берган интервьюсида ҳозир Эронда 2000 га яқин баллистик ракета бор, деди. Унинг сўзларига кўра, мамлакат яқин икки йил ичида 8 000 баллистик ракета захирасига эга бўлиши мумкин. Айнан шу салоҳият ҳарбий амалиётни бошлаш учун асос бўлган омиллардан биридир.

Яқин Шарқдаги вазият кескинлашиши билан нефть нархи бир баррель учун 200-300 долларгача кўтарилиши мумкин. Бу ҳақда Ироқ ташқи ишлар вазири Ҳусайн немис ҳамкасби Вадефуль билан телефон орқали мулоқоти чоғида айтиб ўтди. Мулозимнинг фикрича, натижада Европа давлатларида инфляция кучаяди, Ироқ каби ишлаб чиқарувчи мамлакатлар учун нефть экспорти жараёни мураккаблашади.

Ҳусайн, шунингдек, Ҳормуз бўғози ёпилиши ортидан Форс кўрфази ва Ироқдан нефть бозорига кириб келаётган кунлик тахминан 5 миллион баррель нефть узилиши мумкинлигини таъкидлаган. Қолаверса, минтақадаги ҳарбий ҳолат Европага томон янги қочқинлар тўлқини кучпйишига ҳам олиб келади.

Сўнгги хабарларга кўра, Эрон Исроил зарбасидан сўнг дунёдаги энг йирик газ кони – Жанубий Парсда газ қазиб олишни қисман тўхтатган. Ер юзидаги энг йирик, Форс кўрфазида – Эрон ва Қатар ҳудудида жойлашган мазкур кон жаҳон газ захирасининг 8 фоизини, Ислом Республикаси умумий газ захирасининг 50 фоизини ташкил қилади.

С.Раҳимов, ЎзА