Жамоалар ўртасида Буюк Британиянинг Лондон шаҳрида ўтказилаётган жаҳон чемпионатининг тўртинчи кунги мусобақаларида Нодирбек Абдусатторов, Жавоҳир Синдоров, Рустам Қосимжонов, Нодирбек Ёқуббоев, Гулруҳбегим Тоҳиржонова, Нилуфар Имомқўзиева, Афрўза Ҳамдамова, Шамсиддин Воҳидовдан иборат “Uzbekistan” жамоаси кеча блиц бўйича кечган 12 та турнирнинг барчасида ғалабага эришди.

Яъни 24 очко жамғариб, “С” гуруҳи ғолиби сифатида кейинги босқичдаги иштирокини давом эттирмоқда.

Бугун, 15 июль куни дунёнинг энг кучли гроссмейстерларини жамлаган 52 жамоа иштирок этаётган ушбу нуфузли мусобақанинг блиц баҳслари 1/8 финал ўйинлари бошланиб, кун давомида 16 та жамоа орасидан ғолиб ва совриндорлар аниқланади.

Кучлилар сафидан жой олишга интилаётган “Uzbekistan” жамоаси ғолиблик йўлидаги курашни давом эттира оладими? Бу саволга жавобни айнан бугун 1/8 финалда шахматчиларимизнинг “Д” гуруҳида 4-ўринни эгаллаган Қозоғистоннинг “Barys.kz” жамоасига қарши баҳс натижаси орқали билиб оламиз.

Шунингдек, ушбу босқичда “А” гуруҳида 1-ўринни эгаллаган “WR Chess” жамоаси чорак финал чиптаси учун “В” гуруҳида 4-ўринни банд этган “Malcolmʼs Mates” шахматчилари билан куч синашса, “Hetman GKS Katowice” (Д3) – “Germany and Friends” (C2), “MGD1” (Д1) – “Generation XYZA” (C4), “Knight Dance” (A3) – “HexamindChess” (B2), “Freedom” (B1) – “FIDE MB” (A4), “Rookies2 (C3) – “KazChess2 (Д2), “Theme International Trading” (B3) – “Ashdod Elit Chess Club” (A2) жамоалари кейинги босқич йўлланмаси учун кечадиган “ақл жанглари”да тўқнаш келади.

Эслатиб ўтамиз, жамоалар ўртасидаги жаҳон чемпионатининг умумий мукофот жамғармаси 500 минг евро этиб белгиланган бўлиб, блиц мусобақаларида совриндор бўлган жамоалар ўртасида 190 минг евро тақсимланади.

Т.Рўзиев, ЎзА