Исроил 13 июнга ўтар кечаси Эронга йирик кўламда ҳужум уюштириб, мамлакат ядровий дастурининг асосий объектлари ва юқори мартабали ҳарбий раҳбарларини нишонга олди. Исроил бош вазири Рисинг Лион операцияси Эроннинг Натанздаги асосий уран бойитиш заводига ва ядро олимларига зарба берганини маълум қилди.

Эрон давлат ОАВлари ҳужумларда ҳалок бўлганлар орасида Эрон Ислом инқилоби гвардияси бош қўмондони генерал Ҳусайн Саламий ҳам борлиги ҳақида хабар бермоқда. Теҳрондаги турар жой биноларида ёнғинлар бошланган. Инфратузилма объектларига ҳам зарар етган.

Шундан сўнг, Эроннинг юқори мартабали ҳарбий амалдори Теҳрон Исроилнинг мамлакат ҳудудига берган авиазарбаларига қатъий жавоб қайтаришини маълум қилди. Эрон олий раҳбари Оятуллоҳ Али Хоманаий Исроил бу зарбаси билан “ўзи учун аччиқ ва оғриқли тақдир тайёрлаганини” ва “қаттиқ жазо” кутиши кераклигини билдирган.

Ҳиндистоннинг Аҳмадобод шаҳридан учган йўловчи самолёт шифокорлар ҳостелига бориб урилиб ҳалокатга учрагани ҳақида хабар берилган эди. Воқеа тафсилотларига кўра, оқибатда 290 киши ҳалок бўлган. Ҳалок бўлганлар орасида ҳам самолётдаги, ҳам ердаги одамлар борлиги айтилган.

Ҳалокат оқибатида Air India авиакомпанияси самолёти бортида бўлган 242 кишидан жами 241 нафари ҳалок бўлди, дея хабар берилган. Битта британиялик йўловчи омон қолгани айтилган.

АҚШ Ички хавфсизлик департаменти юз минглаб муҳожирларга Қўшма Штатларда яшаш ва ишлаш рухсатномаси бекор қилингани ва улар мамлакатни тарк этиши кераклигини маълум қилди. Ушбу билдиришнома Байден давридаги озод қилиш дастури орқали Қўшма Штатларга келган Куба, Гаити, Никарагуа ва Венесуэла фуқароларига тегишли. Хабар ушбу мамлакат фуқаролари электрон почта манзилларига юборилган.

АҚШ президенти Дональд Трамп 13 июнга ўтар кечаси Исроил ҳарбий самолётлари Эронга ҳужум қилишидан бир неча соат олдин худди шу вазиятдан қочишга умид қилганини айтган. Бу ҳақда CNN хабар берди.

“Мен бундай бўлишини хоҳламайман, чунки бу вазиятни ўзгартириб юборади”, деди Трамп Теҳроннинг ядровий амбицияларини чеклаш учун дипломатик саъй-ҳаракатларини назарда тутиб.

Бирор жойда расман ишламайдиган ёки ўқимайдиган, шунингдек, бармоқ изини топширмаган ҳамда рус тилини ўрганмаган мигрантлар Россияни тарк этиши керак. Бу ҳақда Россия ИИВ раҳбари Владимир Колокольцев айтиб ўтди. Унинг мурожаати видеоси вазирлик расмий вакили Ирина Волкнинг телеграм-каналида эълон қилинган.

«Кўчаларда ва турар жой секторида ноқонуний келаётган мигрантлар бўлмаслиги керак. Ишини йўқотганлар, ОТМдан ҳайдалганлар, дактилоскопиядан ўтмаганлар, тил ўрганмаётганлар, Россия жамиятига фойда келтирмаётганлар мамлакатимизни тарк этиши керак», – деди Колокольцев.

Ички ишлар вазирлиги раҳбари «мигрантлар ўртасидаги жиноятчиликка қарши тизимли курашиш», «олдини олиш» учун ишлашга чақирган. Колокольцев кўрилган чораларни «айбдорлар учун жазо муқаррарлигини таъкидлаган ҳолда» ёритиш кераклигини таъкидлаган.

<iframe width="650" height="420" src="https://www.youtube.com/embed/-rDNSm6lG94" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА