АҚШ Ироқ элчихонасининг асосий бўлмаган ходимларини хавфсизликка таҳдидлар кучайгани сабабли эвакуация қилади. Расмийлар эвакуацияга айнан нима сабаб бўлганини батафсил очиқламаган. Бироқ сўнгги кунларда Эрон ядровий дастури бўйича музокаралар тўхтаб қолган, деб ёзган BBC. Мудофаа вазирлиги маълумотларига кўра, Ироқда 2,5 мингга яқин АҚШ ҳарбийлари жойлашган.

Россия 12 июнга ўтар кечаси Shahed типидаги ҳужумчи дронлардан фойдаланган ҳолда яна Харьков шаҳрини ўққа тутган. Шаҳар мери Игорь Тереховга кўра, Россия ҳарбийлари бир кечада Харьковга 12 та зарба берган. Дронлардан бири мактаб ҳудудига, иккинчиси эса болалар боғчаси майдончасига келиб урилган.

Бундан ташқари, Харьковнинг Салтовский туманидаги 2 та турар жой биноси ва фитнес маркази ҳам зарбалар қурбони бўлган. Ҳужум оқибатида камида 11 киши, жумладан, 4 нафар бола яралангани очиқланган. 

Ғазода автобусга ҳужум уюштирилиши оқибатида кўплаб Ғазо гуманитар жамғармаси (ҒГЖ) ходимлари ҳалок бўлгани айтилмоқда. Бу ҳаракатда АҚШ ва Исроил томонидан қўллаб-қувватланадиган гуманитар ёрдам ташкилоти ХАМАСни айбламоқда. ХАМАС эса ҳозирча айбловларга жавоб бермаган. Ходимлар Хон Юнуснинг ғарбий қисмидаги тарқатиш марказига йўл олгани айтилган. ҒГЖ йигирмадан ортиқ жамоа аъзолари бўлган автобус маҳаллий вақт билан соат 22:00 атрофида ХАМАС томонидан ҳужумга учраганини маълум қилган.

Европа Иттифоқи 10 июнь куни Россияга қарши янги санкциялар пакетини эълон қилди. Иттифоқнинг фикрича, Москванинг Украинага қарши ҳар кунги ҳужумлари унинг тинчликдан манфаатдор эмаслигини кўрсатмоқда.

Янги санкциялар пакети Кремлнинг нефть ва газ қазиб олишдан пул ишлаш қобилиятини нишонга олган. Бу Россия 2022 йилда Украинага қарши кенг кўламли босқинни бошлаганидан бери 18-санкция ҳисобланади.

Ҳиндистонда бортида 242 киши бўлган йўловчи самолёти ҳалокатга учради.

Air India самолёти ҳавога кўтарилганидан бир неча дақиқа ўтиб радарлардан ғойиб бўлган. Дастлабки маълумотларга кўра, самолёт баландликка чиқа олмаган ва турар-жой ҳудудига қулаган.

Ҳалок бўлганлар ва жароҳатланганлар ҳақида ҳозирча аниқ маълумот йўқ. Самолёт бортида 230 нафар йўловчи ва 12 нафар экипаж аъзоси бўлгани айтилмоқда.

<iframe width="650" height="420" src="https://www.youtube.com/embed/fUyl_ML6nRw" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА