БАА-Ўзбекистон миллий терма жамоалари ўртасидаги ўзаро статистикаларда устунлик ким томонда?

Футбол бўйича Ўзбекистон миллий терма жамоасининг Бирлашган Араб Амирликлари жамоаси билан ўтказган омадли ўйини тарихий натижага эришишимизга сабаб бўлганлиги билан эътиборлидир.

Абу-Даби шаҳридаги "Ал Наҳайён" стадионида ўтган БАА-Ўзбекистон жамоалари қарама-қаршилигидаги ўйин ҳар жиҳатдан ҳаяжонли бўлиши билан бирга Ўзбекистоннинггина эмас, Марказий Осиё мамлакатларида истиқомат қилаётган миллионлаб футбол ишқибозларининг катта қувончига, ғурури юксалишига сабаб бўлди.

Ягона мақсад, улуғ орзулар теграсида бирлаштирувчи, ҳамжиҳатликка чорловчи ушбу натижа жараёнида икки жамоа ўртасидаги ўйинлар сарҳисоби қандай кўринишда эканлиги кўпчиликка қизиқ бўлиши табиий.

Хўш, футбол бўйича БАА-Ўзбекистон миллий терма жамоалари ўртасидаги ўзаро статистикаларда устунлик ким томонда?

Айтиш лозим, маълумотларга кўра, икки жамоа бугунгача ўзаро умумий 19 бор тўқнаш келган. 9 та учрашувда рақибларимизнинг қўли баланд келган бўлса, 6 та беллашувда вакилларимиз муваффақиятга эришган.

Ўтказилган 4 та қарама-қаршиликда эса муроса йўли танланган. Миллий терма жамоамиз ушбу баҳслар давомида умумий ҳисобда 20 та гол уриб, 25 бора ўз дарвозасидан тўп олиб чиққан.

Агарда фақатгина жаҳон чемпионати саралашидаги ўйинларига эътибор қаратадиган бўлсак, устунлик яна рақиблар тарафда. Ўзбекистон миллий терма жамоаси футболчилари 1 та ўйинда ғалаба қозониб, 3 та учрашувда мағлуб бўлган. 2026 йилги жаҳон чемпионати йўлланмасини тақдим этган ўтган кун "Ал Наҳайён"даги дуранг билан ҳисоблаганда бу борадаги ҳисоб-китоблар 2 тани ташкил этмоқда.  

Бирлашган Араб Амирликлари билан ўтказилган умумий учрашувлар вазиятида Ўзбекистон миллий терма жамоасининг энг йирик ғалабаси 2014 йил 14 октябрь кунига тўғри келади. Ўшанда юксак орзуларга кўз тиккан футболчиларимиз 4:0 ҳисобида рақибларини доғда қолдирганди. Дарвоқе, бундан 11 йил муқаддам йирик ғалабанинг илк голини терма жамоамизнинг бугунги устози Тимур Кападзе араблар дарвозасига йўллаганди.

Энг йирик мағлубиятимиз эса 2001 йил 17 август куни содир бўлган. Ўшанда Абу Дабининг "Ал-Ваҳда" стадионида ўтган ўйинда терма жамоамиз 4:1 ҳисобида БАА жамоасига имкониятни бой берган.

ЖЧ-2026 йўлидаги ўтган кунги муроса йўли эса ҳар қандай натижадан ҳам қадрли бўлганлигини бугунги кайфиятимиз, дунё аҳли, жаҳон футболининг мутасаддилари, турли тилларда сўзлашувчи олам аҳли баралла айтмоқдаки, бу, ватанмиз жаҳон халқларига янги Ўзбекистон бўлиб янада ёрқинроқ танилишига замин яратганлиги билан қадрлидир.

Т. Рўзиев, ЎзА