Mamlakatimizda davlatimiz rahbari tashabbusi bilan yo‘lga qo‘yilgan “Dolzarb 90 kun” loyihasi doirasida 1 iyundan 30 avgustgacha yoshlarning bo‘sh vaqtini mazmunli o‘tkazish, ularni sog‘lomlashtirish, kasb-hunarga yo‘naltirish, ta’lim tashkilotlari o‘rtasida yoz oylarida hamkorlikda faol ish olib borish ustuvor vazifa sifatida belgilangan.

Shu maqsadda, mazkur loyiha tizimida “Talabalar kibersport o‘yinlari – 2025” Respublika chempionati o‘tkazilishi e’lon qilindi.

Unga ko‘ra, Oliy ta’lim, fan va innovatsiyalar vazirligi hamda hamkor tashkilotlar, hokimliklar bilan birgalikda “Talabalar kibersport o‘yinlari – 2025” Respublika chempionatining dasturi tasdiqlandi.

“Talabalar kibersport o‘yinlari – 2025” musobaqalari “Dota2”, “CS2”, “FC25” o‘yinlari hamda “Just Dance” fijital raqs bo‘yicha 3 bosqichda tashkil etilishi nazarda tutilgan.

1-bosqich 9-14-iyun kunlari respublikamizdagi barcha oliy ta’lim muassasalarida tashkil etilsa, 2-hududiy bosqich 16-21 iyun kunlari o‘tkazilib, unda g‘oliblikka erishgan jamoalar 23-25 iyun kunlari Farg‘ona viloyatida tashkil etiladigan final bosqichida kuch sinashadi.

Yoshlarning intellektual salohiyatini oshirishga qaratilgan mazkur “Talabalar kibersport o‘yinlari – 2025” musobaqalarida munosib ishtirok etgan iqtidorli yoshlar mamlakat terma jamoalariga jalb etiladi.

Eslatib o‘tamiz, “Talabalar kibersport o‘yinlari – 2025”ning respublika bosqichi g‘oliblari tegishli darajadagi diplom va medallar bilan taqdirlanadi. Shuningdek, musobaqalarda sovrinli o‘rinlarni egallaganlarga  pul mukofotlari topshiriladi.

T.Ro‘ziyev, O‘zA