Америкалик тадбиркор Илон Маск АҚШ Президенти Дональд Трамп билан зиддиятдан сўнг Америка етакчисининг истагига жавобан унга энг яхши тилакларини билдирди.
– Худди шундай, – дея изоҳлади Маск ижтимоий тармоқ саҳифасида Трампнинг 6 июнь куни Оқ уй матбуот марказида журналистлар билан суҳбат чоғи айтган баёнотини. – Унга фақат энг яхши тилакларимни тилайман.
5 июнь куни Трамп ва Маск ижтимоий тармоқда ўзаро кескин чиқишлар билан алмашди. Миллиардер фикрича, унинг ёрдамисиз Трамп 2024 йил ноябрдаги сайловда ғалаба қозонолмасди. У Трампга импичмент эълон қилиш ғоясини маъқуллаб, Оқ уй томонидан ҳукумат харажатини камайтириш мақсадида Президент томонидан киритилган импорт божи бўйича қонун лойиҳасини танқид қилди ва 2025 йил иккинчи ярмида Америка иқтисодиёти таназзулга юз тутишини башорат қилди.
Трамп, ўз навбатида, Маск ўзига юклатилган вазифани адо этиши лозимлигини таъкидлади.
ABC телекомпаниясининг телефон орқали интервью бериш мурожаатига Трамп Маскни назарда тутиб, “Ақлдан озган йигит ҳақида гапиряпсизми?” дея жавоб берган. Шунингдек, етакчи ўзининг "Tesla" машинасидан халос бўлиш ниятини ҳам ошкор қилди.
Оқ уй расмийси нашрга Трампнинг қизил рангли "Tesla"си “сотилиши ёки совға қилиниши мумкинлиги”ни тасдиқлади.
Трамп ижтимоий тармоқда "Мен Илон ҳақида ўйламайман ҳам, у бечоранинг муаммолари бор" деди.
– Мен Маск билан бир лаҳза ҳам гаплашмоқчи эмасман, лекин унга яхшилик тилайман, – деди Дональд миллиардернинг 2026 йилги бюджет лойиҳаси юзасидан уни танқид қилганидан “жуда ҳафсаласи пир” эканини билдираркан.
АҚШ раҳбари сўнгги кунларда Маскнинг компаниялари, жумладан "SpaceX" билан ҳукумат шартномаси ва барча субсидиялар бекор қилиниши билан боғлиқ таҳдидларни ҳам кучайтирди.
М.Пирматова, ЎзА