Бирлашган демократик партиядан номзод Ли Чжэ Мён Жанубий Кореядаги навбатдан ташқари президентлик сайловларида ғалаба қозонди. Таъкидланишича, Лининг ғалабаси 2022 йилги аввалги сайловларда собиқ президент Юн Сок Ёлдан атиги 1 фоизлик фарқ билан мағлубиятга учраганидан сўнг эътиборга лойиқ қайтиш бўлди.

Маълумотларга кўра, 98,56 фоиз сайлов бюллетенлари қайта ишлангандан сўнг, мухолифат номзоди Ли Чжэ Мён 49,25 фоиз овозни қўлга киритган. Унинг рақиби, ҳукмрон консерватив «Фуқаролик кучи» партиясидан номзод Ким Мун Суга эса фуқароларнинг 41,40 фоизи овоз берган.

Америкалик тадбиркор Илон Маск Бирлашган Миллатлар Ташкилоти бош котибининг рақамли платформалар ҳақидаги баёнотидан кейин БМТни молиялаштиришни тўхтатишга чақирди. У бу ҳақда Х ижтимоий тармоғидаги саҳифасида ёзди.

Маск фойдаланувчи томонидан эълон қилинган видеога изоҳ берган. Видеода бош котиб рақамли платформалар кўпинча одамларни чалғитиш ва улар ўртасида душманлик уйғотиш учун ишлатилишини айтиб, жаҳон ташкилотини бунга муносабат билдиришга чақиради.

Украинанинг Россия ҳарбий аэродромларидаги самолётларга қарши олиб борган «Ўргимчак тўри» операцияси келажакдаги барча урушларнинг кечишини ўзгартириши мумкин. Бу ҳақда Аксиос (Ахиос) хабар берди.

Маълум қилинишича, Украина Хавфсизлик хизмати томонидан ўтказилган «Ўргимчак тўри» код номли операция Кремль раҳбари Путин учун оғир зарба бўлди. Ҳукуматпараст блогерлар бу ҳужумни Перл-Ҳарбор билан таққосламоқда, ҳарбий экспертлар эса уни Россиянинг миллий мудофааси учун «янги даҳшат» деб атамоқда.

Исроил Сурияга тегишли қуролларга зарба берганини маълум қилди. Бу ҳақда ББC хабар берди.

«Исроилнинг Сурия жанубига берган зарбалари оқибатида кўплаб инсонлар ҳалок бўлиб, моддий йўқотишларга олиб келди. Исроил минтақани беқарорлаштиришга уринмоқда. Бу кескинлашув Сурия суверенитетининг очиқдан очиқ бузилишини англатади», деди Сурия ташқи ишлар вазирлиги.

Telegram мессенжери каналларга хабар юбориш функциясини жорий этди. «Энди сиз каналларга шахсий хабарлар юборишингиз, уларнинг эгалари ва администраторлари билан бевосита мулоқот қилишингиз мумкин. Контент муаллифлари ўз шахсий маълумотларини ошкор қилмасдан обуначилар билан мулоқот қилиш учун ушбу режимни фаоллаштира олади», дейилади хабарда.

Ерга ёпирилган магнит бўрони 67 соатдан ортиқ давом этмоқда. Магнит бўрони давомийлиги бўйича рекорд янгиланиши мумкин.

2017 йилда қайд этилган аввалги рекорд 69 соатни ташкил этганди. Мутахассисларнинг таъкидлашича, сайёранинг магнит майдони ҳолатини акс эттирувчи махсус индекс аномалия бошланганидан 36 соат ўтгач сариқ даражага тушган. Ер яқинидаги Қуёш шамоли хусусиятлари барқарорлашиб, нормал қийматларга етган бўлсада, геомагнит бўронлар ҳали ҳам кузатилмоқда.

<iframe width="650" height="420" src="https://www.youtube.com/embed/lrW_TMYayOQ" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА