Мамлакатимизда сув спорт турларини янада оммалаштириш, айниқса соҳил сув полоси билан шуғулланувчилар сонини янада ошириш ҳамда ушбу йўналишдаги терма жамоамиз таркибига иқтидорли спортчиларни саралаш мақсадида Тошкент вилоятида соҳил сув полоси бўйича Ўзбекистон чемпионати ўтказилди.

Мусобақанинг аёллар ўртасидаги баҳсларида “Uzbekistan Aquatics” жамоаси олтин медални қўлга киритган бўлса, “Гермес” жамоаси фахрли иккинчи ўринни эгаллади. “СКУФ” жамоаси эса ушбу йўналишда кучли учликни якунлаб берди.

Эркаклар ўртасидаги мамлакат чемпионати баҳсларида рақибларидан ҳар жиҳатдан устунлик қилган Наманган вилояти жамоаси шоҳсупанинг энг юқори поғонасидан жой олган бўлса, “Гермес” жамоаси кумуш, Тошкент вилояти жамоаси эса бронза медалига эга чиқди.  

Мамлакатимизнинг турли ҳудудларидан келган 12 та жамоа иштирокида ўтказилган соҳил сув полоси бўйича Ўзбекистон чемпионати ғолиб ва совриндорлари ташкилотчилар томонидан муносиб тақдирланди.

Жавоҳир Тошхўжаев,

ЎзА