Истанбулдаги музокара чоғида Россия томони ҳам Киевга можарони ҳал қилиш бўйича меморандумни топширди. Ҳужжатнинг тўлиқ матни интернетда эълон қилинди, деб хабар тарқатди “РИА Новости”.

Меморандум “Якуний келишувнинг асосий мезони”, “Ўт очишни тўхтатиш шарти” ва “Босқичларнинг кетма-кетлиги ва амалга ошириш муддати” бўлимларидан иборат.

Биринчи бўлимда асосий талаб қуйидагича: Россия Федерациясининг янги ҳудудларини тан олиш, Украина қўшинларини олиб чиқиш, Украинанинг бетарафлик  мақоми, хорижий ва ядровий кучларни жойлаштиришни тақиқлаш, Украина Қуролли Кучлари сонини чеклаш ва рус тилининг расмий мақоми. Шунингдек, санкцияни бекор қилиш, ўзаро даъволардан воз кечиш, Украина православ черкови эркинлиги ва дипломатик алоқани тиклаш ҳам таклиф қилинган.

Иккинчи бўлимда ўт очишни тўхтатишнинг икки йўли кўрсатилган – Украина қўшинларини РФ ҳудудидан зудлик билан олиб чиқиб кетиш ёки “пакет таклиф” – 10 қадам, жумладан сафарбарликни тугатиш, қурол-яроқ етказиб беришни тақиқлаш, амнистия ва президентлик сайловига тайёргарлик.

Якуний қисм жасадларни алмашиш учун сулҳ тузиш, ўт очишни тўхтатиш тўғрисидаги битимни имзолаш, сайлов ва БМТда тинчлик шартномасини ратификация қилишни назарда тутади.

Россия делегацияси раҳбари Мединский таъкидлашича, меморандум ультиматум эмас, балки можарони сиёсий ва дипломатик йўл билан ҳал қилиш учун асосдир.