Turkiyaning Bursa shahrida kattalar o‘rtasida qo‘l jang bo‘yicha o‘tkazilgan jahon chempionatida dunyoning 32 davlatidan kelgan 300 nafardan ortiq sportchi o‘zaro raqobatlashdi.
Quvonarlisi, ushbu nufuzli xalqaro musobaqada O‘zbekiston terma jamoasi 8 ta oltin, 3 tadan kumush va bronza medalini qo‘lga kiritib, umumjamoa hisobida birinchi o‘rinni egalladi.
Dunyo birinchiligida terma jamoamiz a’zolaridan Azizxon Abdullayev, Og‘abek Jumaniyozov, Bekzod Maxamatov, Sevara Sa’dullayeva, Sharofatoy Ortiqova, Mahliyo Habibullayeva, Nilufar Polvonova hamda Umida Abdullayeva oltin medalga sazovor bo‘ldi.
Shuningdek, Husniddin Sattorov, Ilyos Kamilov, Dinora Nabiyeva kumush, G‘iyosiddin Jamoliddinov, Bahrom Olimjonov va Asadbek Hikmatov bronza medali bilan taqdirlandi.
Darvoqe, umumjamoa hisobida Rossiya terma jamoasi 4 ta oltin, 2 tadan kumush va bronza, Qozog‘iston termasi 2 ta oltin, 6 ta kumush, 4 ta bronza medali bilan ikkinchi hamda uchinchi o‘rindan joy oldi.
Javohir Toshxo‘jayev,
O‘zA