Вазирлар Маҳкамаси ҳузуридаги Агросаноат мажмуи устидан назорат қилиш инспекциясига қишлоқ хўжалигига мўлжалланган ерга бўлган ҳуқуқни давлат рўйхатидан ўтказиш учун ўз вақтида мурожаат этмаслик билан боғлиқ ҳуқуқбузарликлар тўғрисидаги ишларни кўриб чиқиш ваколати берилмоқда.

Олий Мажлис Қонунчилик палатаси мажлисида иккинчи ўқишда кўриб чиқилган “Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги қонун лойиҳасида айнан шу масалалар кўзда тутилмоқда. 

Қонунчилик палатасининг Аграр ва сув хўжалиги масалалари қўмитаси раиси Равшан Мамутовнинг қайд этишича, бугунги кунда қишлоқ хўжалиги соҳасидаги республика ижро этувчи ҳокимият органларининг трансформация қилиниши қонунчилик ҳужжатларига бу органларнинг расмий номларини аниқлаштириш учун тегишли ўзгартиришлар киритилишини талаб этади. Мазкур қонун лойиҳаси билан Ўзбекистон Республикасининг Маъмурий жавобгарлик тўғрисидаги кодексига ва бошқа қонунларига Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг номини аниқлаштиришни назарда тутувчи ўзгартиришлар киритилмоқда.  

Шунингдек, инспекцияга қишлоқ хўжалиги ерларига оид ҳуқуқни давлат рўйхатидан ўтказиш учун ўз вақтида мурожаат этмаслик билан боғлиқ ҳуқуқбузарликлар тўғрисидаги ишларни кўриб чиқиш ваколатини бериш кўзда тутилмоқда. Агар ерга оид ҳуқуқлар ўз вақтида рўйхатдан ўтказилмаса, жавобгарлик белгиланиши мумкин.  

Қонун лойиҳаси аграр соҳадаги республика ижро этувчи ҳокимият органларининг яхлит тизимини шакллантиришга ҳамда ер эгаларини тартибга чақириш, бу борадаги муаммоларни вақтида ҳал этишга хизмат қилиши таъкидланиб, депутатлар томонидан қабул қилинди.

Муҳтарама Комилова,

ЎзА