Швецияда шахмат бўйича ўтказилган “TePe Sigeman & Co Chess Tournament-2025” турнирида 4,5 очко жамғарган ҳамюртимиз Жавоҳир Синдоров ғолиблик шоҳсупасига кўтарилди.

Етти кунлик мусобақаларнинг сўнгги 7-турида Синдоров қора доналарда украиналик афсонавий шахматчи Василий Иванчук билан куч синашди. Қизиқарли ўтган учрашувнинг 41-юриш ҳолатида томонлар муроса йўлини танлади. Бу, ўз навбатида Жавоҳирнинг 4,5 очко жамғаришига олиб келди.

Ғолибликка асосий даъвогарлардан бўлган туркиялик Ягиз Каан Эрдогмус қора доналарда нидерландиялик Эрвин Лами билан дурангга эришиши ҳам Синдоровнинг етакчиликни сақлаб қолишига қайсидир маънода замин яратди.

Шу ўринда таъкидлаш керакки, мазкур турнирнинг ўтган йилги мусобақасида 4,5 очко жамғарган 3 нафар шахматчи - россиялик Петр Свидлер олтин, Аржун Эригаиси кумуш ва Нодирбек Абдусатторов бронза медалини қўлга киритган эди. Бу йилги мусобақаларда Синдоров уларнинг натижасини қайд этган ҳолда якка ўзи яққол устунликка эга бўлгани эътиборли воқеликка айланди.

Турнирда 4 очко жамғарган туркиялик Ягиз Каан Эрдогмус ва швециялик Нильс Гранделиус кейинги поғоналардан жой эгаллади.

Т.Рўзиев,

ЎзА