Qatarda joriy yilning 3-27 noyabr kunlari 17 yoshgacha bo‘lgan futbolchilar o‘rtasidagi Jahon chempionati bo‘lib o‘tadi. Doha shahrida mazkur mundialga qur’a tashlash marosimi bo‘lib o‘tdi.

Qur’a natijasiga ko‘ra, O‘zbekiston U17 terma jamoasi Jahon chempionatining "J" guruhida Paragvay, Panama va Irlandiya termalari bilan raqobatlashadigan bo‘ldi. Futbolchilarimizning dastlabgi uchrashuvi 5 noyabr kuni Paragvayga qarshi o‘tsa, 8 noyabrda Irlandiya bilan kuch sinashadi. Guruhdagi so‘nggi o‘yin 11 noyabr kuni Panama termasiga qarshi tashkil etiladi.

Quyida qur’a natijalari bilan tanishasiz:

"A" guruhi: Qatar, Italiya, JAR, Boliviya

"B" guruhi: Yaponiya, Marokash, Yangi Kaledoniya, Portugaliya

"C" guruhi: Senegal, Xorvatiya, Kosta-Rika, BAA

"D" guruhi: Argentina, Belgiya, Tunis, Fiji

"E" guruhi: Angliya, Venesuela, Gaiti, Misr

"F" guruhi: Meksika, Koreya Respublikasi, Kot-dIvuar, Shveysariya

"G" guruhi: Germaniya, Kolumbiya, KXDR, El-Salvador

"H" guruhi: Braziliya, Gonduras, Indoneziya, Zambiya

"I" guruhi: AQSH, Burkina-Faso, Tojikiston, Chexiya

"J" guruhi: Paragvay, O‘zbekiston, Panama, Irlandiya

"K" guruhi: Fransiya, Chili, Kanada, Uganda

"L" guruhi: Mali, Yangi Zelandiya, Avstriya, Saudiya Arabistoni

Ma’lumot o‘rnida: Qatarda o‘tadigan mundialda 48 ta terma jamoa 4 tadan 12 guruhga bo‘linadi va dastlabki ikki o‘rinni egallagan 24 jamoa va eng yaxshi 8 ta 3-o‘rin egalari 1/16 final bosqichiga yo‘llanma oladi.

Javohir Toshxo‘jayev,

O‘zA