Япониянинг илғор илмий марказларидан бири бўлган Киото шаҳридаги ATR Computational Neuroscience лабораторияси инсон онгининг энг сирли жабҳаларидан бири — тушлар оламига кириш йўлини очувчи технологияни ишлаб чиқди.

Бу технология орқали инсон мияси фаолияти асосида кўрилган тушларни ёзиб олиш ва визуал шаклда қайта тиклаш имконияти юзага келмоқда.

Мазкур технология неврология, сунъий интеллект ва тасвирларни қайта ишлаш соҳасидаги энг сўнгги ютуқларга асосланади. Тизим ишлаши давомида инсон миясининг фаолияти магнит-резонанс томографияси (MRI) ёрдамида кузатилиб, туш пайтида пайдо бўладиган визуал сигналлар махсус алгоритмлар орқали декодланади. Сўнгра ушбу маълумотлар асосида кўрилган тушнинг тахминий визуал тасвири тикланади.

Интернет фойдаланувчилари орасида бу технологияга катта қизиқиш кузатилмоқда. Мутахассислар бу ёндашув келажакда психологик ҳолатларни чуқур таҳлил қилиш, тушлар асосидаги касалликларни аниқлаш ва онг ости жараёнларини ўрганишда янги уфқларни очишини таъкидламоқда.

Шу билан бирга, бу технология атрофида ахлоқий ва шахсий дахлсизлик билан боғлиқ саволлар ҳам юзага чиқмоқда. Тушлар — инсоннинг энг шахсий ва нозик тажрибалари саналади. Уларга кириш ва уларни ёзиб олиш имконияти қандай меъёрлар асосида тартибга солиниши кераклиги борасида ҳали кўплаб муҳокамалар кутилмоқда.

<iframe width="791" height="445" src="https://www.youtube.com/embed/c2xOnuqkbUs" title="Ong sirlarini ochuvchi yutuq" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Шубҳасиз, бу ютуқ инсон онгининг чуқур қатламларини ўрганиш йўлида муҳим қадам бўлиб, келажакда неврология ва сунъий интеллект соҳаларида янги инқилобий ечимларга туртки бўлиши мумкин.

Мадинабону Насриева, Улуғбек Тўхтаев (видео), ЎзА