FOTOREPORTAJ

O‘zbekiston janubidagi go‘zal vohalardan biri Surxondaryo viloyati turli tabiiy boyliklari, tarixiy yodgorliklari va betakror manzaralari bilan ajralib turadi. Ayniqsa, Sariosiyo tumanida joylashgan Xufar qishlog‘i bu yerda sayohat qilgan har qanday inson qalbiga iliqlik baxsh etadi.  

Qishloq tog‘lar etagida, xuddi quchog‘ingizni keng ochsangiz osmon bilan uchrashgudek balandlikda joylashgan. Atrofdagi yashil tepaliklar, sharqirab oqayotgan ariq va buloqlar, musaffo havo – bularning barchasi insonni bir lahzaga bo‘lsa-da, shahar shovqinidan yiroqlashishga chorlaydi.

[gallery-23544]

Bu yerda hayot oddiy, ammo mazmunli. Xufarliklar mehnatkash, ochiqko‘ngil va mehmondo‘st. Qishloqda qadimiy an’analar  asrab-avaylab kelinadi. Uylar orasida qad rostlagan anjir, uzum, yong‘oq va boshqa daraxtlar ko‘zni quvnatadi. Bahor faslida qishloq atrofini ming xil gullar bezab turadi, kuzda esa pishgan mevalarning hidi havoga yoqimli ifor taratadi.

Xufar hali ko‘pchilik uchun kashf etilmagan maskan. Sayohat va tabiat ixlosmandlari uchun bu qishloq haqiqiy topilmadir. Agar siz ham dam olish, sokinlik, tog‘lar va musaffo havo quchog‘ida bir lahza bo‘lishni istasangiz, Xufar sizni kutmoqda.

Jonibek QO‘ZIMURODOV (surat), O‘zA