ФОТОРЕПОРТАЖ

Ўзбекистон жанубидаги гўзал воҳалардан бири Сурхондарё вилояти турли табиий бойликлари, тарихий ёдгорликлари ва бетакрор манзаралари билан ажралиб туради. Айниқса, Сариосиё туманида жойлашган Хуфар қишлоғи бу ерда саёҳат қилган ҳар қандай инсон қалбига илиқлик бахш этади.  

Қишлоқ тоғлар этагида, худди қучоғингизни кенг очсангиз осмон билан учрашгудек баландликда жойлашган. Атрофдаги яшил тепаликлар, шарқираб оқаётган ариқ ва булоқлар, мусаффо ҳаво – буларнинг барчаси инсонни бир лаҳзага бўлса-да, шаҳар шовқинидан йироқлашишга чорлайди.

[gallery-23544]

Бу ерда ҳаёт оддий, аммо мазмунли. Хуфарликлар меҳнаткаш, очиқкўнгил ва меҳмондўст. Қишлоқда қадимий анъаналар  асраб-авайлаб келинади. Уйлар орасида қад ростлаган анжир, узум, ёнғоқ ва бошқа дарахтлар кўзни қувнатади. Баҳор фаслида қишлоқ атрофини минг хил гуллар безаб туради, кузда эса пишган меваларнинг ҳиди ҳавога ёқимли ифор таратади.

Хуфар ҳали кўпчилик учун кашф этилмаган маскан. Саёҳат ва табиат ихлосмандлари учун бу қишлоқ ҳақиқий топилмадир. Агар сиз ҳам дам олиш, сокинлик, тоғлар ва мусаффо ҳаво қучоғида бир лаҳза бўлишни истасангиз, Хуфар сизни кутмоқда.

Жонибек ҚЎЗИМУРОДОВ (сурат), ЎзА