Bugun, 21 may kuni Shvetsiyaning Malmyo shahrida shaxmat bo‘yicha o‘tkazilayotgan “TePe Sigeman & Co Chess Tournament-2025” turnirining 2-turida hamyurtimiz Javohir Sindorov AQSH terma jamoasi tarkibida 2016 yili Butunjahon shaxmat olimpiadasi g‘olibligiga erishgan Rey Robson bilan kuch sinashadi.

Mazkur nufuzli turnirning kecha o‘tgan 1-turida Sindorov ayollar o‘rtasida 16-jahon chempioni xitoylik Tan Chjun’i bilan bahs olib bordi. 

Qora donalarda harakatlangan hamyurtimiz uchrashuvning 60-yurish holatida “TePe Sigeman & Co Chess Tournament-2025” turnirida ishtirok etayotgan yagona ayol shaxmatchini mag‘lubiyatga uchratdi. 

2-tur o‘yinlari ostonasida Javohir Sindorov 1 ochko bilan qo‘shimcha ko‘rsatkichlarga ko‘ra, peshqadamlik qilmoqda. 

Eslatib o‘tamiz, 7 ta turdan iborat bo‘lgan ushbu turnir 26 mayga qadar davom etadi. 

T.Ro‘ziyev, O‘zA