Poytaxtimizdagi O‘zbekiston Kasaba uyushmalari federatsiyasiga qarashli “Suv sporti saroyi”da davom etayotgan suzish bo‘yicha I Markaziy Osiyo ochiq chempionatining dastlabki kuni quyidagi sportchilarimiz shohsupaga ko‘tarildi.
Musobaqaning turli yosh toifalaridagi erkin usulda suzish bo‘yicha 50 va 400 metr masofaga o‘tkazilgan bahslarda Anastasiya Zelinskaya, Sevara Yaxshiyeva, Muhammadsodiq Mahsudov oltin medalga ega chiqqan bo‘lsa, Osiyo Rejapova, Yuriy Petrovnin, Eldor Usmonov marraga ikkinchi bo‘lib yetib keldi. Shuningdek, Mixail Kleshko, Nikita Kornilov, Parizod Abdukarimova, Alina Murmurodova, Zarina Abdusamatova shohsupaning uchinchi pog‘onasidan joy oldi.
[gallery-23474]
Chalqancha 100 metr masofaga suzishda Mixail Kleshko Muhammadismoil Rahmonov, Mahdiya Muhtorova, o‘z yosh toifalarida oltin medalni qo‘lga kiritdi. Shuningdek, Gleb Kadishev, O‘ktamjon Hasanov kumush, Mixail Fokin, Zlata Bekova, Kseniya Pashinina bronza medali bilan taqdirlandi.
Batterflyay yo‘nalishining turli yosh toifalarida 200 va 100 metr masofaga o‘tkazilgan bellashuvlarda Nozimaxon Ismoilova, Eldor Usmonov barcha raqiblarini orta qoldirib, chempionga aylandi. Xusan Zamixullayev, Ismoil Yuxnevich, Sevara Rashidova, Madina Imomnazarova kabi suzuvchilarimiz esa kumush medalga ega chiqqan bo‘lsa, Aleksey Yuxnevich, Javlon G‘aniyev, Abdulaziz Abdumajidov, Liliya Siganenko terma jamoamiz hisobiga bronza medalini keltirdi.
15-17 yosh toifasidagi erkin usulda 4X100 metr masofaga estafeta yo‘nalishida Qozog‘iston 2 terma jamoasi g‘olib chiqdi. O‘zbekiston 1 va O‘zbekiston 2 terma jamoalari esa kuchli uchlikdan joy oldi.
Shuningdek, musobaqaning ilk kunida suzish bo‘yicha turli yo‘nalish va masofalarda g‘olib va sovrindorlar nomi aniq bo‘ldi. Bugun O‘zbekiston, Qozog‘iston, Qirg‘iziston, Tojikiston, Turkmaniston terma jamoa a’zolari I Markaziy Osiyo ochiq chempionatining uchta yosh toifasida brass, batterflyay, erkin, chalqancha, kompleks turlari bo‘yicha bir qator masofalarga suzish bo‘yicha bahslarda raqobatlashadi.
Javohir Toshxo‘jayev,
Sanjar Toshpo‘latov,
Almurod Mamadaminov (surat),
O‘zA