Пойтахтимиздаги “Saxovat sport servis” спорт мажмуасида Халқаро теннис федерациясининг расмий тақвимига киритилган, М15 тоифасига мансуб халқаро турнир бўлиб ўтмоқда.
Беллашувларнинг биринчи куни жуфтлик баҳсларида юртдошларимиз Амир Милушев ва Илья Игнатов дуэти Канада вакиллари Адам Фараг ҳамда Александр Баланни 6:1, 6:1 ҳисобида мағлуб этди. А.Милушев ва И.Игнатов чорак финалда қозоғистонлик Григорий Ломакин ва украиналик Владислав Орлов билан куч синашади.
Ёш теннисчимиз Максим Шин италиялик шериги Лорензо Лоруссо билан биргаликда мусобақани ғалаба билан бошлади. Улар чорак финалда нейтрал мақомдаги теннисчилар — Дмитрий Долженков ва Валентин Копейкин жуфтлигига қарши ўйнайди.
Маълумот учун, яккалик баҳсларида ҳам ҳамюртларимиз: Амир Милушев ҳиндистонлик Каран Сингҳ, Дамир Абдусамадов швейцариялик Маттео Лавиззари, Максим Шин нейтрал теннисчи Алексей Алешчев, Суҳроб Саидов ҳиндистонлик Атрава Шарма, Абдулазиз Усмонжонов эса америкалик Максим Гройсманга қарши кортга тушади.
Жавоҳир Тошхўжаев,
ЎзА