АҚШ Президенти Дональд Трамп Россия Президенти Владимир Путинга сайланганидан кейин учинчи марта қўнғироқ қилди. Суҳбат якунида ҳар икки етакчи қисқа баёнот бериб, тафсилотларга тўхталмади, деб хабар берди BBC. Ушбу мулоқот тахминан икки соат давом этган. Шундан сўнг Путин АҚШ раҳбарига Россия ва Украина ўртасида тинчлик битими тузилишига қаратилган тўғридан-тўғри музокарани қайта тиклашда қўллаб-қувватлагани учун миннатдорлик билдирди. Шунингдек, Россия Украина билан “...келажакдаги тинчлик шартномаси бўйича меморандум” устида ишлашга тайёрлигини айтди.

– АҚШ етакчиси билан келишиб олдикки, Россия Украина томонига келгусида юзага келиши мумкин бўлган тинчлик шартномаси бўйича қатор ёндашувлар, масалан келишув тамойили, эҳтимолий сулҳ муддати ва ҳоказо жиҳатларни таклиф қилади, – деди Путин. – Жумладан, агар тегишли битимга эришилса, биз маълум бир муддатга ўт очишни тўхтатиш бўйича меморандум тузишга тайёрмиз. Томонлар тинчликка имкон даражасида интилиши, ҳар жиҳатдан қулай муросага эришиши лозим. Россия учун асосийси инқирознинг асосий омилларини бартараф қилиш.