Xalqaro shaxmat federatsiyasi tomonidan ortda qolgan nufuzli musobaqalar sarhisobiga ko‘ra, e’lon qilib boriladigan “FIDE Circuit-2025”ning yangilangan reytingida o‘zbekistonlik 4 nafar shaxmatchining nomi qayd etildi.
Mazkur reytingda “Grand Chess Tour” tizimidagi “Superbet Chess Classic Romania-2025” xalqaro turnirida g‘oliblikka erishgan hindistonlik Rameshbabu Pragnanandxa 68.40 ochko bilan “FIDE Circuit-2025” jadvalida peshqadamlikka erishdi.
Ikkinchi o‘rinni xitoylik Ding Liren 40.64 ochko bilan band etgan vaziyatda yaqinda Birlashgan Arab Amirliklarida Osiyo chempionligini qo‘lga kiritgan eronlik Daneshvar Bardiya 33.39 ochko bilan 3-pog‘onadan joy oldi.
O‘zbekiston terma jamoasi a’zolaridan Nodirbek Abdusattorov 18.42 ochko bilan “FIDE Circuit-2025” ro‘yxatida 14-o‘rinni, Shamsiddin Vohidov 17.03 ochko bilan 18-o‘rinni, Nodirbek Yoqubboyev 14.50 ochko bilan 21-o‘rinni hamda Muhiddin Madaminov 14.22 ochko bilan 22-qatorni egalladi.
“FIDE Circuit-2025” reytingida eng ko‘p ochko to‘plagan shaxmatchi jahon chempionligi uchun nomzodlar turniri yo‘llanmasiga ega chiqadi.
Eslatib o‘tamiz, o‘tgan yilning 5 mart holatida Nodirbek Abdusattorov ushbu reytingda yetakchilik qilgan edi.
T.Ro‘ziyev, O‘zA