Bir hafta ichida energiya resurslaridan noqonuniy foydalanish tufayli qariyb 38 milliard so‘m zarar yetkazildi
Bu haqda "O‘zenergoinspeksiya" axborot xizmati xabar berdi.
Unga ko‘ra, inspeksiya tomonidan o‘tgan haftada o‘tkazilgan nazorat tadbirlari davomida energiya manbalariga qonunga xilof ravishda ulanish bo‘yicha 92 ta holat aniqlangan. Ushbu qoidabuzarliklar natijasida 15,6 million kilovatt soat elektr energiyasi va 1,8 million metr kub tabiiy gaz talon-toroj qilingani ma’lum bo‘ldi.
Olib borilgan hisob-kitoblarga ko‘ra, keltirilgan zarar hajmi 37 milliard 921 million so‘mni tashkil etdi.
Shuningdek, mazkur holatlar yuzasidan energiyadan foydalanish tartibini buzgan shaxslarga nisbatan 126 ta ma’muriy ish rasmiylashtirilib, tegishli materiallar huquqni muhofaza qiluvchi idoralarga topshirildi.
N.Ziyodullayeva tayyorladi, O‘zA