Сингапурда бадиий гимнастика бўйича 20 та давлат спортчилари иштирокида ўтаётган Осиё чемпионатида Ўзбекистон ўсмирлар ва катталар терма жамоаси икки кунлик баҳслар сарҳисобига кўра, 1-ўринни эгаллади.

Жорий йил август ойида Бразилияда ташкил этиладиган жаҳон чемпионатига саралаш вазифасини ўтаган Осиё чемпионатининг ортда қолган кунида Ўзбекистон гимнастикачилари 4 олтин, 1 кумуш ва 1 бронза медалини қўлга киритди.

Тахмина Икромова, Анастасия Саранцева, Наталья Усова, Мумтоза Исҳоқзода, Иродахон Содиқова, Эвелина Аталянc, Амалия Мамедова, Аделя Файзулина, Мафтуна Заировадан иборат катталар терма жамоаси Ўзбекистон спортчиларининг маҳоратини намойиш этган бўлса, Виктория Никифорова, София Усова, Алана Ҳафизова, Милана Сафина, Кристина Шин, Жасмин Яхлакова, Ёсина Жўраева, Замира Хвалчевадан иборат ўсмир гимнастикачиларимиз яккалик ва гуруҳ мусобақаларида совринли ўринларга эгалик қилди.

Чемпионатнинг алоҳида дастурларида маҳоратли спортчимиз Тахмина Икромова ва ўсмирлар жамоаси гуруҳ машқларида олтин медалларга сазовор бўлгани, Анастасия Саранцева яккаликда кумуш медал билан тақдирлангани жаҳон чемпионати учун муҳим балларни жамғаришига замин яратди.

Бугун, 18 май чемпионатнинг ҳал қилувчи куни бўлиб, унда гимнастикачи қизларимиз қатор дастурларда куч ва маҳоратини синовдан ўтказади.

Т.Рўзиев, ЎзА