Toshkent botanika bog‘ida O‘zbekiston Respublikasi Fanlar akademiyasi tomonidan Osiyo taraqqiyot banki (OTB) va Jahon banki dasturi ko‘magida “Formula-2025” ochiq osmon ostidagi keng ko‘lamli ilmiy-ommabop festival tashkil etildi.

“Formula-2025” O‘zbekistondagi birinchi yirik milliy ochiq osmon ostidagi ilmiy aloqa platformasi bo‘lib, u olimlar, ixtirochilar, o‘qituvchilar, talabalar, maktab o‘quvchilari hamda ilm-fan va kelajakka qiziquvchi barchani birlashtirdi.  

Festival turli viktorinalar, mahorat darslari va ilmiy stendlar, olimlarning ochiq va qiziqarli ma’ruzalari, ilm-fanda ayollarning roliga bag‘ishlangan panel sessiya hamda Fanlar akademiyasi olimlari o‘rtasida “Zakovat” intellektual o‘yini kabi keng ko‘lamli tadbirlarni qamrab oldi.

–Biz ilm-fan rivoji aholi farovonligini oshirish va iqtisodiy o‘sishga olib keladi, deb hisoblaymiz, – deydi OTBning O‘zbekistondagi vakolatxonasi rahbari Kanokpan Lao Arayya. –  Innovatsiyalarni joriy etish va strategik islohotlarni qo‘llab-quvvatlash orqali biz texnologiya va bilim modernizatsiyasining harakatlantiruvchi kuchiga aylangan O‘zbekistonda barqaror va inklyuziv iqtisodiyotni barpo etishga o‘z hissamizni qo‘shmoqdamiz.

Tadbir davomida O‘zbekiston Fanlar akademiyasi vitse-prezidenti Shahlo Turdiqulova fanga stereotiplar emas, iste’dodlar kerakligini, ilm yo‘lini tanlagan har bir yosh yangi yutuq va g‘oyalar sari qadam qo‘yishi lozimligini qayd etdi.

[gallery-23421]

Festivalga tashrif buyuruvchilar biologiyadan tortib arxeologiyagacha turli fanlar bo‘yicha olimlar tomonidan qilinayotgan yangiliklar bilan yaqinroq tanishish imkoniyatiga ega bo‘ldi.  

Muhayyo Toshqorayeva,

O‘zA