Оғир атлетика бўйича Хитойда катталар ўртасида ўтказилган қитъа чемпионати якунланди.

28 та давлатнинг 200 нафардан зиёд маҳоратли спортчилари иштирок этган чемпионатнинг сўнгги кунида эркаклар ўртасида +109 кг вазн тоифасида ёш спортчимиз Амир Абдуллаев ўз омадини синовдан ўтказди.

Эрон, Хитой, Шимолий кореялик маҳоратли оғир атлетикачилар, Жаҳон ва қитъа чемпионатларининг совриндорлари билан илк бор нуфузли мусобақада рўбарў келган ёш спортчимиз ўз маҳоратини намойиш этди. Ҳамюртимиз даст кўтаришда 182 кг натижа қайд этиб, делегациямиз ҳисобига яна бир бронза медалини қўшиб қўйди.

Бугун, 16 май эрта тонгда “кичик жаҳон чемпионати”да муносиб натижага эришган оғир атлетикачиларимиз Ислом Каримов номидаги Тошкент халқаро аэропортида тантанали кутиб олинди.

Кутиб олиш маросимида иштирок этган Спорт вазирлиги, Миллий олимпия қўмитаси, Ўзбекистон оғир атлетика федерацияси мутасаддилари, кенг жамоатчилик вакиллари мусобақалар муросасиз ўтганини қайд этишди. 28 та давлат орасида 3 та олтин, 3 та кумуш ва 6 та бронза медалини қўлга киритган Ўзбекистон терма жамоаси умумжамоада 4-ўринни эгаллади.

Терма жамоамиз Осиё чемпионатида тўлиқ таркибда иштирок этмаган ҳолда Хитой, Шимолий Корея, Эрон терма жамоаларига муносиб рақобат кўрсатгани эътиборли бўлди. Қолаверса, Хитойдаги баҳслар кейинги йил Японияда бўладиган ёзги Осиё ўйинлари, келгусидаги жаҳон чемпионатлари, яна уч йилдан сўнг АҚШда ўтадиган ёзги Олимпия ўйинлари олдидан нафақат спортчилар, балки мураббий-мутахассислар учун ҳам катта имтиҳон вазифасини ўтади.

Осиё чемпионатида Ватан шаънини улуғлаган спортчиларга гуллар ва тегишли совғалар тақдим этилди.

Т.Рўзиев,

ЎзА