Бугун бозорларимизда гўштнинг нархи қанча? Масалан, “Фарҳод деҳқон бозори”да суяксиз гўштлар 125-130 минг сўмдан сотилмоқда. Бошқа бозорларда ҳам шундай ўртача нарх 125-140 минг сўмни ташкил этади.

Албатта бу энг аввало гўштнинг сифати, турига ҳам боғлиқ. Чунки, харидорлар кўпинча энг сара гўштни олишни истайди. Шунинг учун суякли гўштлар 30-40 минг сўм арзонроқ сотилади.  

Бундан ташқари импорт қилиб олиб келинаётган гўштлар харидорларга суяклиси 65 минг сўмдан ва суяксизи 80 минг сўмдан таклиф этилмоқда. Уларнинг нархи арзон бўлсада маҳаллий етиштирилган чорва маҳсулотларига бўлган талаб халқимизда юқори.  

Шу билан бирга пойтахт бозорлари билан республикамизнинг турли ҳудудларида сотилаётган гўштнинг нархи бироз фарқ қилади. Чунки, Тошкент шаҳридаги арзонлаштирилган расталардаги 65-75 минг сўмлик гўштнинг бир кундаги сотилиши 15-18 фоизни, тадбиркорлар растасидаги 90-95 минг сўмлик рўзғорбоп гўштлар 82-85 фоизни,110-130 минг сўмлик суяксиз (лаҳм) гўшт 1-2 фоизни ташкил этади.  

Шу ўринда маҳсулот етказиб берувчи чорвадорлар ҳам бугунги бозор талаб ва таклифидан келиб чиқиб, ўз харажатларини чегириб ташлаб, нарх белгилайдилар.  

Мамлакатимизда ўтган йили чорвачилик ва унинг тармоқларини ривожлантириш учун умумий қиймати 5 триллион 800 миллиард сўмлик 1 минг 300 дан ортиқ лойиҳа амалга оширилди. Бунинг натижасида маҳсулот ишлаб чиқариш ҳажми  ошди.

Ушбу даврда 2 миллион 900 минг тонна тирик вазнда (1 миллион 700 минг тонна сўйилган вазнда) гўшт ишлаб чиқарилди. Шунинг баробарида жами 93 минг тонна гўшт импорт қилинди.  

Яъни, ишлаб чиқарилган гўштга нисбатан импорт салмоғи 5.4 фоизни ташкил этди. Импорт қилинган гўштнинг 70 фоизи қайта ишлаш корхоналарига йўналтирилган бўлса, қолган қисми Тошкент шаҳри деҳқон бозорларидаги арзонлаштирилган савдо расталарида сотилди.

Шунингдек, Ўзбекистон Республикаси Президентининг 2025 йил 30 январдаги “Яйловларни муҳофаза қилиш ва улардан оқилона фойдаланишнинг замонавий механизмларини жорий этиш чора-тадбирлари тўғрисида”ги фармони ҳамда “Чорвачилик ва паррандачиликни қўллаб-қувватлаш, соҳада юқори қўшилган қиймат яратиш бўйича қўшимча чора-тадбирлар тўғрисида”ги қарорининг қабул қилиниши ҳам эндиликда соҳа учун кўплаб қулайликларни яратиб берди.  

Республикамизда чорвачилик тармоғини ривожлантириш бўйича амалга оширилаётган ислоҳотлар натижасида сўнги беш йилда чорвачилик корхоналарида чорва мол бош сони икки баробарга, маҳсулот ишлаб чиқариш уч баробарга оширилди.

Наслчилик корхоналарининг сони  400 тадан 1900 тага ва зоти яхшиланган қорамоллар салмоғи 30-35 фоиздан 70-75 фоизга етказилди.

Республикамиз аҳолисини гўшт билан узлуксиз таъминлаш бўйича ҳукуматимиз томонидан тасдиқланган дастурлар асосида тизимли ишлар амалга оширилмоқда.

Давлатимиз раҳбарининг жорий йилда қабул қилган Фармон ва қарорлари мамлакатда яйлов хўжалигини ривожлантиришни янги босқичга олиб чиқиши, соҳада бошқарувнинг ихчам ва самарали тизимини жорий этишда, чорвачилик хўжаликларининг ер участкаларига бўлган ҳуқуқларини эътироф этиш борасидаги масалаларни ҳал қилишда муҳим аҳамиятга эга.  

Албатта бошланган ислоҳотлар келгусида аҳоли севиб истеъмол қиладиган гўшт ва сут маҳсулотлари таннархининг арзон бўлишига, ишлаб чиқариш қувватларини кенгайтириш ҳамда тармоқда фаолият

олиб бораётган инсонларнинг моддий манфаатдорлигининг ошишига хизмат қилади.   

<iframe width="640" height="420" src="https://www.youtube.com/embed/5Tap-K4brXQ" title="O‘zbekistonda go‘shtning narxi qancha?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аброр Содиқов, Улуғбек Тўхтаев (видео), ЎзА