Уругвайнинг собиқ президенти, дунёда “энг камбағал президент” сифатида танилган Хосе Мухика 89 ёшида оламдан ўтди. Уни қисқа қилиб испанчасига эркалаб “Пепе” деб чақиришарди. Унинг вафоти ҳақида мамлакатнинг амалдаги раҳбари Яманду Орси маълум қилди.

"Биз ҳамкасбимиз Пепе Мухиканинг вафотини чуқур қайғу билан эълон қиламиз. У фаол раҳбар ва чин инсон эди. Сизни жуда соғинамиз, азиз оқсоқол. Халқингизга бўлган муҳаббатингиз учун ташаккур", — деб ёзган Орси.

Хосе Мухика ёшлигиданоқ сиёсий фаолиятга қизиққан. 1960–70 йилларда мамлакатдаги сўл радикал ҳаракат аъзоси сифатида фаолият олиб борган ва тахминан 14 йилни ҳарбий қамоқхоналарда ўтказган.

Хосе Мухика 2005–2008 йилларда Уругвайнинг қишлоқ хўжалиги вазири лавозимида ишлаган, 2009 йилда “Кенг фронт” сўл партиясидан президентликка номзод сифатида сайловда иштирок этиб, ғалаба қозонди. 2010–2015 йилларда Уругвай президенти бўлиб хизмат қилди. У нафақат сиёсатчи сифатида балки оддий турмуш тарзи билан танилган инсон эди.

Мухиканинг ҳаётга ва ҳокимиятга муносабати бутун дунёда эътироф этилди. У давлат раҳбари сифатида фаолият юритган пайтларида расмий қароргоҳ ўрнига, шаҳар четидаги кичик фермада рафиқаси билан яшашни афзал кўрди. Мавқеига қарамасдан, 90% маошини хайрия ишларига сарфлади. У 1987 йилда ишлаб чиқарилган Volkswagen Beetle автомобилини ҳайдар, умуман шоҳона ҳаёт унга ёт эди. 2014 йилда унинг эски машинасини 1 миллион долларга сотиб олиш таклифини берганларга рад жавобини берган.

Мухика нафақат соддалиги, балки чуқур фалсафий нутқлари, инсонпарварлик ғоялари билан ҳам машҳур эди. У шу сабабли сенаторлик нафақасидан ҳам воз кечган эди.

2024 йилда унга қизилўнгач саратони ташхиси қўйилган ва бу дарднинг давосизлигини билиб шифокорлар билан маслаҳатлашган ҳолда, даволанишни рад этишга қарор қилган:

"Мен кекса инсонман ва иккита сурункали касаллигим бор. Жарроҳлик ёки биокимёвий даволаш менинг организмимга оғирлик қилади", — деган эди у бир интервьюсида.

Хосе Мухика инсониятга оддийлик ва ҳақиқий етакчилик қандай бўлиши мумкинлигини кўрсатиб кетди. Унинг ҳаёти — фақат сиёсий фаолият эмас, балки ватанга ва инсониятга хизмат қилиш, доим халқ билан бирга бўлиш намунаси эди.

<iframe width="650" height="420" src="https://www.youtube.com/embed/sl1ycV0Q5B8" title="U dunyodagi eng kambag‘al prezident edi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА