Ниҳолнинг чинорга айланиши катта бир давр ва вақт силсиласини ўз ичига олади. Бугун юртимиз олий ўқув юртларида таҳсил олаётган, ўз билим ва кўникмаларини шакллантириш йўлида изланишлар олиб бораётган, тафаккурини чархлаётган юзлаб талаба-ёшларнинг барчаси ҳам мамлакатимиз илм-фанининг улкан чинорларига айланмас, аммо фаровон ҳаёт асоси бўлган ишлаб чиқариш бўғинларида, маданий-маърифий соҳалар, ижтимоий-сиёсий тизимлар тараққиётига ҳисса қўша оладиган инсонлар бўлиб камолотга эришиши тайин.
Давлатимиз раҳбари томонидан имзоланган “Ёшларга оид давлат сиёсати тўғрисида”ги Ўзбекистон Республикасининг қонунида ёшларни ижтимоий жиҳатдан қўллаб-қувватлаш, уларнинг интеллектуал, ижодий ва ўз йўналишларидаги салоҳиятини камол топтириш учун шарт-шароитлар яратилиши назарда тутилган. Бу борада олий таълим муассасаларида талаба-ёшлар иштирокида ўтказилаётган маданий-маърифий тадбирларнинг аҳамияти беқиёс.
Куни кеча Мирзо Улуғбек номидаги Ўзбекистон миллий университети ташкил топганининг 107 йиллик юбилейи муносабати билан ўтказилган "Университетим – менинг фахрим" номли маънавий-маърифий тадбир ҳам айни мақсадларга қаратилди.
Университетнинг хорижий филология факултети, инглиз тили кафедраси профессор-ўқитувчилари, ижтимоий фанлар, тарих, биология ва экология факультетлари талабалари иштирок этган тадбирда талаба-ёшлар Ўзбекистон илм-фани ривожига беқиёс ҳисса қўшган юзлаб олиму-фузалолар, профессорлар ҳаёти, илмий мероси, улар томонидан яратилган ноёб асарлар ҳақида сўз юритди.
Миллий университетнинг ташкил этилиш тарихи, ўтган давр мобайнида олиб борилган кенг қамровли ўқув ишлари хусусида талабалар томонидан саҳна кўринишлари намойиш этилди.
Тадбирда иштирок этган ўқитувчи-олимлар, етакчи мутахассислар Президент Шавкат Мирзиёев томонидан илгари сурилган “Янги Ўзбекистонни барпо этиш – бу шунчаки хоҳиш-истак, субъектив ҳодиса эмас, балки туб тарихий асосларга эга бўлган, халқимизнинг асрий интилишларига мос, миллий манфаатларимизга тўла жавоб берадиган объектив зарурат” эканлигини таъкидлади. Бунда бугун ҳар жиҳатдан ўз ўрнини топиб бораётган, халқаро рейтинглардаги натижаларни янгилаб келаётган Ўзбекистон миллий университетининг тутган ўрни не чоғли аҳамиятли эканлиги айтиб ўтилди.
Савол-жавоб ва мунозараларга бой кечган маънавий-маърифий тадбир иштирокчиларга катта завқ бағишлади. Бу каби маънавий тадбирлар уларнинг етук мутахассислар бўлиб етишишига хизмат қилиши билан аҳамиятлидир.
Зеро, ёшлар – таянчимиз ва келажагимиз давомчилари.
<iframe width="650" height="420" src="https://www.youtube.com/embed/7Ng-LsHOVCs" title="Yoshlar – tayanchimiz va kelajagimiz davomchilari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Н.Раҳмонова , ЎзА