Ёшларнинг сиёсий-ҳуқуқий билим ва кўникмаларини юксалтириш, уларни қонун ижодкорлиги жараёнига кенг жалб этиш, ёш авлоднинг сиёсий фаоллигини оширишда Ёшлар парламенти муҳим институтга айланмоқда.

Таъкидлаш лозимки, Ёшлар парламентининг ҳар бир аъзоси ўзи истиқомат қиладиган ҳудуд ёшларининг муаммоларини ўрганиб, сабабларини аниқлаб, уни ёшлар ўртасида муҳокама қилган ҳолда бартараф этиш чораларини кўрмоқда. Қолаверса, қонун ижодкорлиги жараёнида иштирок этиб, тенгдошларининг хоҳиш-истакларини қонунчиликка татбиқ этиш, уларнинг таклифларини парламентга олиб чиқишга интилмоқда.   

Шу йилнинг 23-30 апрель кунлари Ўзбекистон Республикаси Олий Мажлиси Қонунчилик палатаси ҳузуридаги Ёшлар парламентининг янги таркиби учун навбатдаги сайловларнинг республика босқичи бўлиб ўтди.   

Қайд этиш лозимки, Олий Мажлис Қонунчилик палатаси Кенгашининг “Ўзбекистон Республикаси Олий Мажлиси Қонунчилик палатаси ҳузуридаги Ёшлар парламенти фаолиятини такомиллаштириш тўғрисида”ги қарорига мувофиқ Ёшлар парламентига сайловлар уч босқичда бўлиб ўтди. Мазкур қарор асосида сиёсий партиялар томонидан Қонунчилик палатаси ҳузуридаги Ёшлар парламенти аъзоларини сайлаш тартиби тўғрисидаги низомлари тасдиқланди.   

20 март-1 апрель кунлари сиёсий партияларда Ёшлар парламентига сайловларнинг биринчи босқичи барча туман ва шаҳарларда бўлиб ўтди. Ушбу босқичда республика бўйича жами 9 минг 531 та ариза келиб тушган. Туман (шаҳар) саралаш босқичи ҳакамлар ҳайъатининг хулосасига кўра, жами 2 минг 493 нафар иштирокчи сайловнинг иккинчи – ҳудудий босқичида иштирок этди. Ҳудудий босқичлардан эса жами 530 нафар иштирокчи сайловнинг учинчи – сиёсий партиялар томонидан республика босқичида иштирок этди.   

Республика босқичи якунига кўра, тавсия этилган 150 нафар номзод рўйхати Олий Мажлис Қонунчилик палатасининг Ёшлар масалалари бўйича комиссиясига тақдим этилди. Ёшлар парламенти аъзолари сиёсий партияларнинг Қонунчилик палатасида эгаллаган депутатлик ўринларига мутаносиб равишда қуйидагича ўринларга эга бўлди: 64 нафари ЎзЛиДеП, 29 нафари “Миллий тикланиш”, 21 нафари “Адолат” СДП, 20 нафари ХДП, 16 нафари Экопартияга тўғри келади.   

Ёшлар парламентининг янги таркиби ёшлар масалаларини ҳал этиш, ёшларнинг ҳуқуқ ва манфаатларини ҳимоя қилиш, ғоя ва ташаббусларини рўёбга чиқариш ҳамда уларни ислоҳотлар жараёнига фаол жалб этишда ташаббускор бўлади.   

Муҳтарама Комилова, ЎзА