13-15 май кунлари "SAEx Uzbekistan" Халқаро кўргазма марказида “Ўзбекистон Энергетика ҳафтаси – UEW 2025” республика ёқилғи-энергетика комплексининг энг катта конференция-кўргазмасига старт берилди. Айтиш керакки бундай йирик намойишлар нефть-газ конларининг катта захирасига эга бўлган Ўзбекистон учун соҳага янги технологиялар, ускуналар, инвестициялар, билим ва инновациялар кириб келиши учун қулай платформани юзага келтиради.

Халқаро кўргазма компанияси “Iteca Exhibitions” ва унинг ҳамкорлари кўмагида ташкил этилиб, ташкилотчилар ҳафталик доирасида Ўзбекистон Республикаси энергетика тармоғининг ривожланиши ва минтақавий диалог учун барча шарт-шароитларни яратиб берди.  

Ҳафталикнинг иш дастурида халқаро форум, нефть-газ конференциялари ташкил этилади. Бу йилги форум “Барқарор энергетика учун минтақавий ҳамкорлик” шиори остида ўтказилмоқда. Алоҳида эътибор “яшил энергетика” масалаларига қаратилган бўлиб, бу давлатимиз раҳбари ташаббуси билан эълон қилинган “Атроф-муҳитни муҳофаза қилиш ва “яшил” иқтисодиёт йили”да белгилаб берилган устувор йўналишларга ҳамоҳангдир.  

Форумнинг уч кунлик дастурида вазирлик ва экспертлар диалоглари, пленар сессия, панел ва техник сессиялар, халқаро мутахассислар иштирокида тақдимотлар кўзда тутилган.  

Бу ерда ёқилғи-энергетика комплексининг икки асосий йўналиши – углеводородлар қазиб олиш ва электр энергетика соҳасини ўз ичига олади. Кўргазмаларда тақдим этилаётган жиҳоз ва технологияларнинг амалий қўлланилиши, конференцияларнинг мавзулари – тадбирнинг илмий-амалий компоненти билан зич боғлиқдир.  

Энергетика ҳафтасининг бирлашган экспозициясига 465 та компания ва бренд, 90 нафар спикер ва 1420 нафар делегат қатнашиши кутилмоқда.  Тадбир иштирокчилари 34 мамлакатдан: жумладан, Австрия, Озарбойжон, Афғонистон, Беларусь Республикаси, Буюк Британия, Германия, Грузия, Дания, Ҳиндистон, Эрон, Италия, Франция ва Япония каби давлатлардан энг илғор ва бугунги кунда соҳа учун долзарб бўлган технология ва ускуналарни намойиш этилмоқда.

Айтиш керакки, Ўзбекистоннинг нефт-газ саноати иқтисодий ўсишнинг стратегик драйвери бўлиб, ишлаб чиқаришнинг барқарорлигини таъминлаш, айникса, қўшимча қийматли юқори маҳсулот яратишга қаратилгандир. Бир вақтнинг ўзида, соҳа корхоналарининг модернизацияси ва технологик янгиланиши, энергия самарадорлигини ошириш ва атмосферага зарарли чиқиндиларни камайтириш бўйича кенг кўламли ишлар олиб борилмоқда.

Кўргазмада маҳаллий ишлаб чиқарувчилар “Ўзбекнефтгаз” АЖ ва  27 та компания нефть-газ, контрол-ўлчов жиҳозлари ва хизмат кўрсатиш соҳасида ўз маҳсулотлари билан иштирок этмоқда. Шундан 10 таси илк бор қатнашяпти.  

Ҳафталик доирасида G2B ва B2B форматидаги учрашувлар, икки томонлама ҳужжатларни имзолаш маросимлари, энергетика соҳасидаги технологиялар ва стартаплар танлови, бизнес-викторина, энергия тежамкорлик мавзусидаги расмлар кўргазмалари бўлиб ўтади.  

Шу билан бирга жорий йилда барча тадбирлар ягона майдонда ўтказилади, бу эса самарали мулоқот, тажриба алмашинувига, инновация ва бизнес муҳитни бирлаштиришга хизмат қилади.  

<iframe width="640" height="480" src="https://www.youtube.com/embed/6hAc8CcflWg?si=ljC57eEFZ34mFbFJ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аброр Содиқов, Улуғбек Тўхтаев, ЎзА