Кинематография агентлиги буюртмасига биноан “Art zamon media” киностудияси томонидан Ўзбекистонда илк бор чўпонлар ҳаёти ва фаолиятига оид “Чўлиқ” номли бадиий фильм суратга олинмоқда.

– Илк бора катта лойиҳага мустақил қўл уришим, – дейди сценарий муаллифи ва постановкачи режиссёр Жамолиддин Қўзибоев.– Авваллари кинорежиссёр Ҳилол Насимов бошчилигида бир неча лойиҳаларда ишлаганман. Мана энди ижодий жамоам билан чўпонлар ҳақидаги кинокартинани суратга олмоқдамиз. Мазкур кинокартина орқали инсон матонати, чўпонларнинг касбига бўлган садоқати ва шу билан бирга, ҳалоллик, поклик каби фазилатларни кўрсатамиз. Ҳозир суратга олиш ишлари якунланди.

Фильмнинг айрим саҳналари Навоий вилоятининг Сентоп туризм қишлоғида ҳам суратга олинган. Шунингдек, Сурхондарё, Қашқадарё, Жиззах, Бухоро ва Тошкент вилоятларида ҳам съёмка жараёнлари бўлиб ўтди.

– Узоқ йиллик танаффусдан сўнг, бу экрандаги илк катта ижодим бўляпти, –  деди актёр Улуғбек Муҳаммадкаримов.– Акам Беҳзод Муҳаммадкаримов ҳар томонлама менга йўл-йўриқ кўрсатиб турадилар. “Чўлиқ” фильмини сценарийсини ўқиганимдаёқ менга жуда маъқул бўлди, мени соғинган мухлисларим учун бу кутилмаган ижодий совға бўлади, деган умиддаман.  

Ҳозирда фильмнинг овозлаштириш жараёнлари ва монтаж ишлари кетмоқда. Яқин кунларда катта премьера бўлиб ўтади.

Н.Усмонова, ЎзА