Илон Маск асос солган Neuralink компанияси латерал амиотрофик склероз (ЛАС) билан оғриган ва нутқ қобилиятидан маҳрум бўлган беморга илк бор мия имплантациясини муваффақиятли амалга оширганини эълон қилди. Бу ҳақида Маск ўзининг «Х» (собиқ Twitter) ижтимоий тармоғидаги саҳифасида маълум қилди.

Маскнинг сўзларига кўра, имплантация жараёни Аризона штатида яшовчи 30 ёшли Бредфорд Смит устида ўтказилган. Смит ҳаракатлана олмайди ва гапира олмайди, бироқ эндиликда у Neuralink  чипи орқали ўз фикрларини компьютер экранига матн шаклида узата олмоқда.

«Бредфорд Смит — Neuralink  чипига эга бўлган дунёдаги учинчи инсон. У деярли тўлиқ фалажланган, аммо бу технология ёрдамида у матн ёзиб, уни овозга айлантира олади. Бу инсоният тараққиёти учун улкан қадам,» — дея таъкидлади Маск.

Neuralink  томонидан ишлаб чиқилган бу илғор технология — мия-компьютер интерфейси (БCИ) — миядан чиқаётган нейрон сигналларни бевосита рақамли қурилмага узатиш имконини беради. Шундай қилиб, бемор ўз фикрларини клавиатура ёки сичқонча каби воситаларсиз компьютерга узата олади.

Компания вакилларининг билдиришича, бу инновацион технология келажакда ҳаракат ва нутқ қобилиятини йўқотган минглаб инсонларнинг ҳаёт сифатини яхшилаш имконини беради. Ҳозирча лойиҳа клиник синов босқичида бўлиб, уни кенгроқ жорий этиш учун техник ва ахлоқий мезонлар бўйича баҳолаш ишлари давом этмоқда.

Шунингдек, нейротехнология соҳасидаги мутахассислар бу ҳодисани тиббиёт ва сунъий интеллект чорраҳасида юз бераётган инқилобий бурилиш деб аташмоқда.

<iframe width="560" height="315" src="https://www.youtube.com/embed/yDAFyJcPWvU?si=DQVysKA980slSPb6" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА