Мамлакатимизда аҳоли мушкулини осон, узоғини яқин қилишга қаратилган хайрли ишлар бир зум тўхтагани йўқ.

Жумладан,  бугунги кунда Хоразм вилоятининг Урганч шаҳрида аҳолининг жамоат транспортидан  фойдаланиш даражаси 38 фоизга етди. Ҳудудда йўловчи ташиш инфратузилмасини янада яхшилаш мақсадида “Бунёд йўловчи ташиш” корхонаси томонидан 7,7 миллион доллар эвазига 80 та замонавий автобус олиб келинмоқда. 

Ҳозирга қадар эса 50 та автобус келтирилган. Натижада уларнинг қатнов оралиқ интервали икки баробарга қисқариб, 5-12 дақиқага туширилди. Аҳоли эҳтиёжларини ҳисобга олиб, автобуслар 4 та ички йўналиш бўйлаб   ҳаракатланмоқда. 40 минг нафардан ортиқ йўловчига хизмат кўрсатиб келаётган замонавий автобуслар хизматидан кекса-ю ёш бирдек мамнун.

— Аввал йўналишда бўлган автобусларнинг ҳар бири 200-300 кишига хизмат кўрсатган бўлса, янги автобусларнинг ҳар бири минг кишига хизмат кўрсатмоқда. Автобуслар камералар билан таъминланган,  — дея фикр билдиради "Бунёд йўловчи ташиш” корхонаси директори Азамат Мустафоев. — Президентимиз ташриф буюриб, янги автобусларни кўздан кечирди ва аҳолимизга сифатли хизмат кўрсатиш бўйича ўз тавсияларини берди.

Дарҳақиқат, бундай шароитлар транспорт етишмовчилиги ва фуқароларнинг эркин ҳаракатланишига замин яратиб, тирбандликнинг олдини олишда муҳим саналади. 

Ҳудудда фаолият юритаётган – “ЕВРО – 5” талабларига муносиб мазкур жамоат транспортлари сиғими 70 кишилик, 21 ўриндиқдан иборат бўлиб, ногиронлар ва бошқа йўловчилар учун кенг қулайликларга эга. Шунингдек, Wi-Fi тизими ҳам мавжуд.

Қайд этиш лозимки, ҳудудлар учун корхона томонидан тез кунда яна 30 та автобус олиб келиниши кўзда тутилган.

<iframe width="650" height="420" src="https://www.youtube.com/embed/F3M5WE6y_sA" title="Xorazmda Transport sohasi bo‘yicha aholiga yangi qulayliklar yaratilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Абдулазиз Рустамов, ЎзА