Мамлакатимизда аҳолининг ижтимоий ҳимоясини кучайтириш, давлат томонидан фуқароларга ижтимоий хизмат кўрсатиш кўлами ва турларини кенгайтириш бўйича изчил ислоҳотлар олиб борилмоқда. Айниқса, хотин-қизлар муаммоларини тизимли ҳал этиш, уларни ижтимоий қўллаб-қувватлаш, ногиронлиги бор опа-сингилларимизга қулай шароитлар яратиш ва уларни касб-ҳунарга, билим олишга жалб этиш масалаларига алоҳида эътибор қаратилмоқда.
Бунинг натижасида айниқса, ногиронлиги бор хотин-қизлар касб-ҳунар эгаллаб, ўзларини ўзлари банд қилишмоқда, вақтини мазмунли ўтказиш баробарида моддий фаровонлик сари интилишмоқда. Имконияти чекланган эмас, аслида имконияти чексиз хотин-қизлар қўл меҳнатлари орқасидан бугун жамиятда ўз ўрнига эга бўлишмоқда.
Тошкент шаҳрида таваллуд топган Феруза Шожонова биринчи гуруҳ ногирони. Туғилган вақтида ҳаракатда бўлган, аммо балоғатга етганида секин-аста суяк ва мускулларида ҳаракатсизлик бошланган. Унга миопатия Вердниг-Гоффман ташхиси қўйилади.
Ҳаракати чеклана бошланган қиз тўқувчиликни, тикувчиликни ўрганади. Бугунги кунда у болалар кийимлари, қўғирчоқ, юмшоқ ўйинчоқлар, уларнинг кийимларини тўқиш ва тикиш билан шуғулланиб келади. “Ҳунарманд” уюшмаси Тошкент шаҳар бошқармасининг таклифи билан қатор кўргазма ва ярмаркаларда қўл меҳнати маҳсуллари билан иштирок этмоқда. Орзу-ниятлари чексиз, ҳаётдан умидлари катта бўлган Ферузани суҳбатга чорладик:
— Ёшлигимдан болалар кийимлари, қўғирчоқ, юмшоқ ўйинчоқлар ва уларга кийимлар тўқиш, шунингдек, матодан қўғирчоқлар тикиш билан шуғулланиб келаман. Инклюзив ногиронлар жамияти таклифи билан у ердаги ногиронлиги бор шахсларга 2 йил давомида 3 ойлик курслар асосида тўқувчиликдан дарс ўтиб, ўзимда борини уларга ўргатганман. Кўргазма ва ярмаркаларда маҳсулотларимиз билан иштирок этиб, уларни сотамиз. Қолаверса, хорижий давлатлардан ҳам буюртмалар бўлади. Меҳнатларим бесамар кетмаяпти, ҳунарим орқали ўзимнинг дори-дармонларимни олишга, қолаверса, оиламиз бюджетига ҳам ёрдам беришга ҳаракат қиламан.
Бугун юртимизда биз каби ногиронлиги бор фуқароларни қўллашга, кўмаклашишга эътибор катта. Бундан хурсанд бўламан. Мақсадим бор ҳунарларимни хотин-қизларга ўргатиш ва шу орқали ўзимдан ном қолдириш, давлатимиз мукофотларини олишга муносиб бўлиш, — дейди Ферузахон.
<iframe width="650" height="420" src="https://www.youtube.com/embed/RdH021DLAZA" title="Imkoniyati cheksiz Feruza" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳтарама Комилова, Анвар Аҳмедов (видео), ЎзА