Бир неча кун аввал Франция жанубидаги масжидда намоз ўқиётганда ваҳшийларча ўлдирилган Абубакир Сиссе хотирасига ҳурмат бажо келтириш учун кеча юзлаб одам Париждаги Республика майдонида намойиш уюштирди. Бу ҳақда “Euronews” хабар берган.

Бирдамлик карвонига нодавлат ташкилотлар, сиёсий вакиллар ва диний етакчилар қўшилиб, айрим исломга қарши кайфият билан боғлиқ ҳолатларни танқид остига олди.

Франция етакчилари ҳужумни қоралади. Жумладан, Бош вазир Франсуа Байру воқеанинг исломофобик хусусиятини таъкидлади.

– Қурбоннинг оиласи ва ҳайратда қолган намозхонлар билан елкама-елкамиз, – деди юқори мартабали мулозим. – Қотил қўлга олиниши ва жазоланиши таъминланиши учун барча давлат ресурслари сафарбар қилинди.

Президент Эммануэль Макрон “Юртимизда динга асосланган ирқчилик ва нафратга ҳеч қачон ўрин бўлмайди”, деди.

Расмийлар фожианинг асосий гумондори кеча тунда Италияда ҳуқуқ-тартибот идоралари томонидан қўлга олинганини айтди. Хабарларга кўра, Х.Оливе исмли эркак босниялик, Лиондаги диний оилада тарбияланган 11 ака-укадан бири.

Франция ички ишлар вазири Бруно Ретаилло айтишича, жиноятчи воқеадан сўнг ижтимоий тармоққа видео жойлаштирган ва ҳатто “сурункали қотил”га айланишни истаётганини билдирган.

Мусулмон Зиё, ЎзА