Америкалик тадбиркор, “Neuralink” нейротехнология компанияси эгаси Илон Маскнинг фикрича, яқин беш йил ичида шифокор жарроҳлар ўрнини робот-жарроҳлар эгаллаши мумкин.

– Роботлар моҳир жарроҳдан бир неча йил, энг зўрларидан эса тахминан беш йил ичида ўзиб кетади, – дея изоҳ берган миллиардер ижтимоий тармоқ орқали. – Шунингдек, “Neuralink” мия тўқимасига электрод кирита олади. Бу вазифани бажариш учун инсонда на тезлик, на аниқлик етади.

Январь ойи бошида Маск илк бор одамга “Neuralink” мия имплантати қўйилгани ва унинг аҳволи яхшилигини маълум қилганди. Қурилма фаолияти натижасида олинган дастлабки маълумот истиқболдан дарак берган.

Кейинчалик тадбиркор “Телепатия” номли янги қурилма эгаси фикр кучидан фойдаланган ҳолда смартфон ёки компьютерни бошқара олишини таъкидлади. Бундай механизм биринчи навбатда оёқ-қўлларини ишлатиш қобилиятидан маҳрум кишилар учун қулай.