Тошкент Ботаника боғида “Пиёзлар боғи”нинг янги мавсуми бошланди. Бу ерда Марказий Осиё, Хитой, Эрон ва Ўрта Ер денгизи минтақасига хос юздан ортиқ ноёб пиёз турлари парвариш қилинмоқда.

Global Allium Garden — Ўзбекистон ва Хитой олимларининг қўшма ташаббуси. У нафақат ўзига хос ўсимликлар боғи, балки икки халқ ўртасидаги дўстлик тимсолига айланган.   

Ҳар бир ўсимлик ёнида жойлаштирилган махсус ёрлиқлар, QR кодлар орқали ташриф буюрувчилар унинг келиб чиқиши ва аҳамияти ҳақида кўпроқ маълумот олиши мумкин.   

Янги фасл билан бирга, “Пиёзлар боғи” Тошкентнинг яна бир бетакрор гўшасига айланган. Бу ерга ташриф буюриб, табиатнинг ранг-баранг мўъжизаларига гувоҳ бўлишингиз мумкин.

26 апрель куни тантанали равишда ушбу боғда “Пиёзлар боғи”нинг янги мавсуми очилди. Маросимда Хитой Фанлар академиясининг Кунминг Ботаника институти олимлари ва Ўзбекистон Фанлар академияси вакиллари иштирок этишди.   

Global Allium Garden лойиҳаси илк бор 2018 йилда ташкил этилган бўлиб, бугунги кунда дунёдаги йирик пиёзсимон ўсимликлар коллекцияларидан бирига айланган. Дастлаб, 0,5 гектар майдонда асос солинган бўлса, бугун ўзбекистон флораси қаторида бошқа геофит турлар — лолалар, гулсафсарлар ва ширачлар ҳам етиштирилмоқда.   

Ҳозирда “Пиёзлар боғи”да Марказий Осиё, Хитой, Эрон, Кавказ, Туркия ва Ўрта Ер денгизи минтақасига хос 100 дан ортиқ пиёз турлари парвариш қилинмоқда. Ҳар бир турнинг лотинча номи, тарқалиш ҳудуди ва қисқача тавсифи кўрсатилган махсус маълумотлар ҳам тайёрланган.   

Бундан ташқари, боғда Ўзбекистонда кенг тарқалган пишиқ ва доривор пиёз навларидан иборат алоҳида коллекция ташкил этилган. Бу эса нафақат ботаниклар, балки қишлоқ хўжалиги ва озиқ-овқат соҳаси мутахассисларининг ҳам эътиборини тортмоқда.   

“Пиёзлар боғи” — Ўзбекистон ва Хитой ўртасидаги илмий ҳамкорлик ва дўстлик рамзига айланган йирик лойиҳалардан бири. Ҳар йили ўтказиладиган мавсумий тадбирлар юзлаб ташриф буюрувчиларни ўзига жалб қилмоқда. Шу билан бир қаторда, ички ва халқаро туризмни ривожлантиришга ҳисса қўшмоқда.   

<iframe width="791" height="445" src="https://www.youtube.com/embed/LJm02efcUNc" title="“Piyozlar bog`i”ning yangi mavsumi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Келгусида Тошкент Ботаника боғида янги, кенг кўламли илмий экспозицияларнинг очилиши режалаштирилган.  

Шу тариқа, бугун Тошкент ва Кунмингдаги Global Allium Garden марказлари дунёнинг турли бурчакларидан келган ўсимликшунослар ва сайёҳларни ўзига жалб этишда давом этмоқда.  

М.Эшмирзаева, ЎзА